BRITANIA E MADHE-Një shqiptar i dyshuar si kreu i një bande që kobntrabandonte njerëz thotë se nuk duhet të deportohet pasi nuk i pëlqejnë burgjet belge. Dailymail shkruan Adriatik Hysenlika po përballet me ekstradimin nga Britania e Madhe pasi u dënua me dhjetë vjet burg për grumbullimin e të paktën 1 milion paund si kreu i një bande trafikimi që kontrabandonte emigrantë të paligjshëm në vend në pjesën e pasme të kamionëve.
Ai pretendon se dëbimi do t’i mohonte atij aksesin tek djali i tij dyvjeçar, i cili lindi në Britani. Avokatët e tij thonë gjithashtu se kjo do të shkelte të drejtat e tij të njeriut pasi burgjet në Belgjikë janë të mbipopulluara. Hysenlika, 43 vjeç, mbërriti në Britani në vitin 1998, me pretendimin se po persekutohej në Shqipëri. Atij iu dha një pasaportë e Mbretërisë së Bashkuar në vitin 2007.
43-vjeçari u arrestua nga Agjencia Kombëtare e Krimit gushtin e kaluar pas një kërkese të autoriteteve belge, ku ishte dënuar në mungesë për 60 vepra emigracioni. Banda e tij thuhet se ka qenë e përfshirë në kontrabandimin e emigrantëve nga Shqipëria dhe Greqia përmes Belgjikës, Francës dhe Holandës drejt Britanisë së Madhe. Hysenlika ndodhet në burgun Wandsëorth të Londrës dhe është bërë një kërkesë për t’i hequr nënshtetësinë britanike./ZËRI
