GREQI- 50 persona janë dënuar nga Gjykata e Apelit në Selanik për trafikim të lëndëve narkotike në ambientet e Universitetit Aristotele të Selanikut, në sheshin Rotonda dhe Navarino.
Pas hetimeve, Policia e Sigurimit të Selanikut, zbuloi se në krye të grupit kriminal kishte shqiptarë që kishin fituar mbi 500.000 euro duke bërë 500 shitje në ditë.
Sipas mediave të huaja, 5 vjet e gjysmë pas operacionit të madh policor që çoi në arrestimin e gjithsej 60 personave, gjykata shpalli fajtorë 50 prej tyre për krijimin e një organizate kriminale dhe trafikun e drogës brenda një institucioni arsimor. 47 të pandehurit u dënuan me burgim nga 6.9 vjet deri në 15.5 vjet, ndërsa tre të tjerëve u dënuan me burgim deri në tre vjet.
Gjoba nga 50.000 deri në 100.000 euro u vendosën gjithashtu për të dënuarit me burgim. Shumica e të pandehurve u përfaqësuan nga avokatë. Por dy nga të pandehurit kanë vdekur dhe ndaj tyre janë pushuar kallëzimet penale, ndërsa 11 mbeten në paraburgim për akuzat e tjera./ZËRI
