TIRANË- Ish-deputeti i LSI-së Vangjel Tavo, ka reaguar pas humbjes së vajzës së tij, në një aksident të ndodhur rreth dy javë më parë në Maqedoninë e Veriut. Tavo shprehet falenderues për të gjithë personat që i qëndruan afër në këto ditë të vështira, edhe pse kjo nuk e zhbën humbjen e madhe të vajzës së tij.
Postimi i Vangjel Tavos:
Të nderuar të afërm, miq, e dashamirës,
Asgjë nuk e zhbën humbjen e madhe të familjes sonë por mbështetja juaj tejet njerëzore dhe e pakufi ka qenë ngushëllim i rëndësishëm e domethënës për të gjithë ne.
Shprehim mirënjohjen e thellë për gjithësecilin prej jush për respektin që treguat, duke e vlerësuar tej mase që erdhët nga të gjitha qytetet e vendit, si edhe nga shumë shtete jashtë kufijve, për të na u gjendur pranë e duke na u bërë krah.
I shprehim mirënjohjen edhe të gjitha autoriteteve dhe instancave zyrtare, të cilat u angazhuan maksimalisht për të na asistuar në çdo nevojë.
Nuk urojmë kurrë që t’jua shpërblejmë mirënjohjen në të tilla rrethana, por vetëm në të mira e gëzime për ju dhe familjen tuaj!
Me përulje, mirënjohje dhe respekt të thellë për të gjithë ju.
Vangjel Tavo dhe Familja
Eva Tavo, 24-vjeç humbi jetën në një aksident rrugor të ndodhur në Maqedoninë e Veriut në datën 29 Nëntor. Lajmin për ndarjen nga jeta të saj, e dha vetë Tavo, ndërkohë që Eva disa vite më parë kishte humbur dhe të ëmën.
/Zëri
