TIRANË- Shtyhet seanca gjyqësore në Gjykatën e Posaçme kundër Korrupsionit dhe Krimit të Organizuar për masakrën e Lushnjes. Shkak për shtyrjen e seancës është bërë mungesa e dëshmitarit, Arsen Xhuti, ndaj takimi i radhës në sallën e gjyqit është lënë për më 19 tetor, në orën 14.30. E pranishme në gjyq ishte edhe prokurorja e SPAK, Doloreza Musabelliu. Kjo e fundit, sipas dëshmisë të së penduarit të drejtësisë, Artan Tafanit, ishte në vëzhgim për t'u vrarë nga një prej personave në gjykim, Laert Haxhiu. Si pasojë, seanca është shoqëruar me debate mes palëve pasi Laert Haxhiu ka refuzuar që të marrë dijeni për seancën e sotme nëpërmjet oficerit të kontaktit.
Fillimisht ka pretenduar se është infektuar nga pandemia e koronavirusit dhe më pas e ka refuzuar takimin me agjentin, por edhe me përfaqësuesin e Ambasadës Shqiptare në burgun, ku po mbahet në paraburgim. Kështu që në këto kushte, avokati Detar Hysi refuzoi që të vijonte me mbrojtjen e klientit të tij pasi pretendon se është i zgjedhur nga familjarët dhe jo nga vetë Haxhiu.
"Nuk mund të mbroj një person që nuk më ka thënë tagrin. Tashmë kanë ndryshuar kushtet ligjore dhe Laert Haxhiu ka një adresë, kështu që duhet të vendosë ai vetë për avokatin e tij,"-tha avokati Hysi në sallën e gjyqit.
Megjithatë, trupa gjykuese e kryesuar nga Erjon Çela vendosi që të mos e pranojë kërkesën e avokatit, pasi togat e zeza bënë me dije se gjykimi do vazhdojë në mungesë, pasi nuk mund të presin të pandehurin, që sipas gjykatësit refuzon që të marrë dijeni për procesin që po zhvillohet nga GJKKO në Shqipëri.
Në seancat e mëparshme, para trupës gjykuese u shfaqën disa sekuenca të pamjeve filmike të marra nga biznesi i dy dëshmitarëve, aty ku rezulton të këtë ndodhur vrasja. Taullau dhe Lala në asnjë moment nuk pranuan se në pamjet filmike të shfaqej Laert Haxhiu apo Orgest Bilbili, të akuzuar për krimin. Por, prokurorja, Doloresa Musabelliu, kërkoi rrëzimin e dëshmisë Saimir Taullaut, për shkak se ka mospërputhje në dy deklaratat të dhëna në kohë të ndryshme. Një tjetër kontraditë sipas prokurorisë është se në dëshminë e parë, Taullau ka deklaruar se pas ngjarjes i ka dërguar njerëz familjes së viktimës Zamir Latifit për të treguar se ai nuk ka lidhje me vrasjen, ndërsa në seancë nuk e ka pranoi një fakt të tillë. Dëshmitari tjetër, Lorenc Lala i cili rezulton menaxher në bisnezin e Taullaut tha se Laert Haxhiun dhe Orgest Bilbilin i njihte, por ditën e ngjarjes nuk kanë qenë në asnjë moment aty.
GJKKO ka dënuar me burgim të përjetshëm Orges Bilbilin dhe Anterio Kaloshin, të shpallur fajtor për vrasjen e Zamir Latifit dhe Jurgen Hoxhës, si dhe plagosjen e Bujar Turkut dhe Marius Xhepexhiut, në Lushnje në 2017.
Ndërsa Laert Haxhiu ndodhet i arrestuar në Greqi ku ka kërkuar azil ndërsa Shqipëria kërkon ekstradimin e tij. I riu, u dëgjua për herë të parë në masakrën e 2017-s. Sipas hetimeve, objektiv i ekzekutimit ishte nipi i Aldo Bares (Alfred Shkurti), Xhulio Shkurti, si hakmarrje ndaj historikut të konflikteve midis familjeve Shkurti dhe Haxhiu./Zëri.ai
