TIRANË- Emigrantët dhe azilkërkuesit në kryeqytetin e Tunizisë shprehën të enjten opinione të ndara mbi marrëveshjen e diskutueshme të migracionit të Shqipërisë me Italinë, shkruan Africa News këtë të premte. Parlamenti i Shqipërisë miratoi një marrëveshje që vendi të mbajë mijëra azilkërkues për Italinë në një votim të enjten, pavarësisht protestave nga ligjvënësit e opozitës dhe grupet e të drejtave të njeriut. Për disa nga njerëzit që aktualisht strehohen në një kamp në Tunis, Shqipëria nuk është destinacioni i zgjedhur për ta.
Megjithatë, të tjerë thanë se ishin të hapur për të ardhur në Shqipëri, veçanërisht ata që ikin nga lufta ose shtypja në vendet e tyre.
"Ne kemi nevojë për siguri sepse nuk e dimë se çfarë do të ndodhë me ne në Shqipëri. Nëse vendimi i Evropës do të na ndihmojë, ne e mbështesim atë dhe shpresojmë se ata do të na ndihmojnë sepse ne tashmë po ikim nga lufta," tha Ahmed, një sudanez refugjat, i cili nuk dha mbiemrin.
Sipas marrëveshjes pesëvjeçare, Shqipëria do të strehonte deri në 3000 emigrantë të shpëtuar nga ujërat ndërkombëtare në çdo kohë. Meqë kërkesat për azil pritet të zgjasin rreth një muaj për t'u përpunuar, numri i azilkërkuesve të dërguar në Shqipëri mund të arrijë deri në 36,000 në një vit.
Shqipëria nuk është anëtare e Bashkimit Evropian dhe ideja e dërgimit të azilkërkuesve jashtë bllokut është e diskutueshme, thihet më tej në artikull. Marrëveshja, e nënshkruar në nëntor midis kryeministrit shqiptar Edi Rama dhe kryeministres italiane Giorgia Meloni, është pjesë e përpjekjeve të Melonit për të ndarë barrën e trajtimit të migracionit me vendet e tjera evropiane.
Më datë 6 nëntor 2023, kryeministri shqiptar Edi Rama dhe kryeministrja italiane Georgia Meloni nënshkruan në Romë marrëveshjen, për të ndërtuar në Shqipëri dy qendra për të strehuar emigrantët. Sipas marrëveshjes, porti i zbarkimit të emigrantëve do të jetë Shëngjini, ndërsa Gjadri do të jetë kampi ku do të ndërtohet vendqëndrimi i tyre. Kapaciteti maksimal që do të mbajë qendra në Shqipëri do të jetë 3000 emigrantë të huaj në muaj./ZËRI
