TIRANË- Prokuroria ka kërkuar 6 vite dhe 6 muaj burg për ish-avokatin Alban Bengasi i cili akuzohet se ka porositur dhunimin e ish-bashkëshortes së tij. Në dosjen e SPAK, pjesë e operacionit “Plumbi i Artë”, Bengasi akuzohet se ka porositur Nuredin Dumanin dhe Eljo Bitrin për të dhunuar ish-bashkëshorten.
Në hetimet e SPAK thuhet se pandehuri Alban Bengasi (ish bashkëshorti i të dëmtuarës Blerta Ruçi), për shkak të konflikteve familjare, ka qënë porositësi i aktit të dhunës, i bashkëhetuari Festim Qoli, është personi që ja ka ofruar si “punë”, të pandehurit Nuredin Dumani, dhe më pas ka mundësuar takimin ndërmjet të pandehurve Alban Bengasi dhe Nuredin Dumani.
I pandehuri Nuredin Dumani, është personi që ka kryer ndjekjen e shtetases Blerta Bengasi, për të mësuar intinerarin e lëvizjeve dhe përditshmërinë e saj, dhe i bashkëhetuari Eljo Bitri është ekzekutori, personi i cili ka goditur shtetasen Blerta Bengasi, ditën e ngjarjes.
Nga hetimet është evidentuar përfshirja në krim edhe e një personi tjetër, shok i të bashkëhetuarit Elio Bitri, i paidentifikuar deri më tani, i cili shfaqet në rolin e ndihmësit pasi ka qenë drejtuesi i mjetit me të cilin është larguar i bashkëhetuari Eljo Bitri nga vendi i ngjarjes./ZËRI
