Nëntë persona mes tyre këngëtarja dhe ish-banorja e Big Brother VIP Albania 2 Ariana Plakici janë arrestuar në Kosovë nën dyshimin për përfshirje në një veprimtari kriminale të lidhur me mashtrimet përmes Call Center-ave.
Sipas Policisë së Kosovës në pranga kanë rënë shtatë meshkuj dhe dy femra. Gjashtë prej të dyshuarve janë shtetas të Kosovës ndërsa tre janë shtetas të Gjermanisë.
Të dyshuarit në bashkëpunim me njëri-tjetrin dyshohet se kanë përdorur qendra thirrjesh në Prishtinë dhe Obiliq për të kontaktuar dhe mashtruar shtetas të huaj. Gjatë kontrolleve në pajisjet kompjuterike të tyre janë gjetur të dhëna të personave të huaj, të cilat dyshohet se janë përdorur në aktivitetin e paligjshëm.
Policia ka ushtruar kontrolle në katër lokacione ku ka sekuestruar 39 kompjuterë, pesë telefona celularë, 12 pajisje të memories së jashtme (HDD) një automjet, si dhe një armë zjarri me gjashtë fishekë.
Në kuadër të operacionit janë sekuestruar gjithashtu 850 euro dhe 100 franga zvicerane.
Ndërkohë, Prokuroria Themelore në Ferizaj ka kërkuar nga Gjykata Themelore në Prishtinë caktimin e masës së paraburgimit për nëntë personat e dyshuar.
Hetimet vijojnë për të zbardhur rolin e secilit prej tyre dhe mënyrën se si dyshohet se funksiononte skema e mashtrimit përmes qendrave të thirrjeve.
