TIRANË- Kopshti në të cilin u dhunua vajza 3-vjeçare në Tiranë ishte pa leje. Lajmi është konfirmuar nga vetë Ministria e Arsimit, ku në një njoftim për mediat deklaron se i ka kërkuar Policisë së Shtetit dhe asaj bashkiake, mbylljen e këtij biznesi që vepron në paligjshmëri të plotë. Rasti i rëndë ka nxitur Ministrinë e Arsimit dhe Sportit, në bashkëpunim me policinë e Shtetit, Policinë Bashkiake dhe Inspektoriatet që të ngrenë Task-Forcën për kontrollin e plotë në territor për subjekte që ushtrojnë veprimtarinë në shërbimet parashkollore për fëmijë dhe do të marrë të gjitha masat e nevojshme për të siguruar që institucionet arsimore, publike apo private, të ofrojnë një mjedis të sigurt dhe të mbrojtur për fëmijët, në zbatim të legjislacionit në fuqi.
Por pavarësisht reagimit të Ministrisë së Arsimit, ndaj edukatores që dhunoi vajzën e mitur nuk është marrë ende asnjë masë.
Reagimi i Ministrisë së Arsimit për ngjarjen e rëndë të dhunimit të një vajze, në një kopsht privat, të pa licensuar:
Ministria e Arsimit nuk toleron asnjë formë të dhunës ndaj fëmijëve në ambientet arsimore, publike apo private. MAS ka ngritur menjëherë Task-Forcën institucionale për verifikimin e subjekteve që ushtrojnë aktivitetin në shërbimet për fëmijët, në bashkëpunim me pushtetin lokal dhe policinë e shtetit.
Ministria e Arsimit dënon me forcë veprimet e dhunshme ndaj fëmijëve dhe kërkon zbardhjen e plotë të rrethanave të ngjarjes, për të marrë masa të menjëhershme dhe të rreptë ndaj përgjegjësve.
Pas transmetimit të ngjarjes së rëndë në emisionin “Stop” në Tv Klan, Ministria e Arsimit dhe Sportit i ka kërkuar menjëherë Policisë së Shtetit dhe Policisë Bashkiake marrjen e masave për mbylljen e menjëherëshme të kopshtit “Stinët”, pasi, nga verifikimet e kryera rezulton se kopshti është në paligjshmëri dhe ushtron aktivitetin i pa licensuar si institucion arsimor parauniversitar privat, në zbatim të ligjit nr.10 081, datë 23.2.2009, “Për licencat, autorizimet dhe lejet në Republikën e Shqipërisë”, të ndryshuar dhe ligjit nr. 69/2012, “Për sistemin arsimor parauniversitar në Republikën e Shqipërisë”, i ndryshuar.
Ministria e Arsimit dhe Sportit, Policia e Shtetit, Policia Bashkiake, Inspektoriatet, do të ngrenë Task-Forcën për kontrollin e plotë në territor për subjekte që ushtrojnë veprimtarinë në shërbimet parashkollore për fëmijë dhe do të marrë të gjitha masat e nevojshme për të siguruar që institucionet arsimore, publike apo private, të ofrojnë një mjedis të sigurt dhe të mbrojtur për fëmijët, në zbatim të legjislacionit në fuqi.
Dhuna ndaj fëmijëve është një shkelje e të drejtave themelore të tyre dhe nuk do të tolerohet në asnjë rrethanë. Ministria e Arsimit do të jetë e vendosur në luftën kundër dhunës në ambientet arsimore për të siguruar që fëmijët tanë të rriten në një mjedis të sigurt dhe të mbrojtur.
Zëri.ai ishte mëngjesin e sotëm pranë ambienteve të kopshtit “Stinët” që gjendet në zonën e Ali Demit, ku konstatuam se aktiviteti vijonte normalisht, megjithatë pranë godinës kishte disa punonjës policie./Zëri.ai
