TROPOJË-Banorët e njësisë administrative Bytyq në Tropojë dhe të dy fshatrave të njësisë Golaj në Has janë ngritur sërish në protestë kundër gjendjes së rëndë të rrugës që lidh këto zona. Banorët në shenjë revolte kanë bllokuar hyrjen për në pikën e kalimit kufitar të Qaf Prushit në Has.
Përfaqësues nga 20 fshatrat të bashkive Has dhe Tropojë kërkuan me ngulm rikostruksionin që lidh fshatrat me aksin nacional, Krumë-Qaf Prush-Gjakovë, pavarësisht premtimeve që janë dhënë gjatë 30 viteve të fundit. Ata janë shprehur se nëse nuk asfaltohet aksi 20 km që është e pakalueshme e që u shërben 2 mijë banorëve, nuk do të dalin në votime më 11 Maj.
Rruga ju shërben 2 mijë banorëve të 15 fshatrave të Tropojës dhe 5 fshatrave të Hasit dhe është në gjendje tejet të amortizuar me gropa të shumta në të gjithë gjatësinë e saj./ZËRI
