HOLANDË- Dega holandeze e Louis Vuitton u gjobit me gjysmë milionë euro sepse punonjësit nuk ndërmorën veprime të mjaftueshme kundër praktikave të pastrimit të parave. Sanksioni lidhet me një rast të vazhdueshëm pastrimi parash që përfshin tre të dyshuar. Gjatë një periudhe të zgjatur, kompania nuk i kontrolloi siç duhet identitetet e klientëve që kryenin vazhdimisht blerje të mëdha me para në dorë, raportojnë mediat e huaja.
Hetimi fillon nga një rast që përfshin një të dënuar të botës së krimit, 55-vjeçarin shqiptar nga Saranda, Thanas Bako, i cili mblodhi sasi të mëdha të ardhurash kriminale për pastrim parash.
Prokurorët thonë se një grua 36-vjeçare nga Lelystad më pas i përdori ato para për të blerë artikuj luksozë në dyqane, përfshirë Louis Vuitton, duke përdorur pseudonime të shumta. Autoritetet dyshojnë se midis gushtit 2021 dhe shkurtit 2023, gruaja, e identifikuar si Bei W., shpenzoi mbi 2 milionë euro fonde të paligjshme. Thuhet se ajo i dërgoi çantat luksoze në Kinë në kuti kartoni për t’i rishitur, duke i maskuar të ardhurat si tregti të ligjshme.
“Kjo praktikë, e njohur si tregtia ‘Daigou’, është një metodë e transferimit të parave kriminale përmes artikujve luksozë. Provat përfshijnë mesazhe në chat, fatura dhe pamje filmike nga kamerat e sigurisë”, deklaruan prokurorët. Hetuesit gjetën gjithashtu kuti në shtëpinë e saj të përgatitura për dërgesë në Kinë.
Skema thuhet se është ndihmuar nga një person i brendshëm. Një ish-asistente shitjesh e Louis Vuitton dyshohet se e ka ndihmuar W. duke e njoftuar atë për mbërritjet e reja të çantave të shtrenjta dhe duke e këshilluar atë për ndarjen e blerjeve për të shmangur shkaktimin e kërkesave ligjore për raportim.
Nga 1 janari 2026, ligji holandez ua ndalon tregtarëve pranimin e pagesave në para të gatshme prej 3,000 eurosh ose më shumë. Prokurorët theksojnë se markat luksoze kanë të njëjtin detyrim si bankat për të verifikuar klientët e tyre sipas rregullave të vendit kundër pastrimit të parave dhe financimit të terrorizmit (Wwft).
Thanas Bako rezulton i dënuar me 7 vjet burg në shtator 2024 nga një Gjykatë në Roterdam. Ai akuzohet si bankier kriminal i nëndheshëm i qindra milionë eurove dhe ishte i përfshirë në “forma të rënda të krimit të organizuar”, sipas gjykatës.
Bako u arrestua në Athinë më 31 maj të vitit të kaluar me kërkesë të Holandës dhe tani ndodhet në një qeli holandeze për më shumë se një vit. Ai thuhet se ka udhëhequr një rrjet korrierësh në Holandë nëpërmjet komunikimeve kripto, i cili ka lëvizur pothuajse një çerek miliardë euro në para për kriminelët. Kjo do të kishte ndodhur në periudhën midis qershorit 2020 dhe marsit 2021.
Rrjeti thuhet se ka funksionuar nga zyra të ndryshme në Holandë, duke përfshirë Wateringen dhe Amsterdam. Anëtarët e rrjetit të korrierëve u dënuan me vite burg në fillim të këtij viti. Historia e Thanas Bakon, nga Saranda, i cili akuzohet se ka pastruar rreth 500 milionë euro të trafikantëve ndërkombëtarë të drogës, është bërë edhe dokumentar, i cili është publikuar në kanalin e Youtube të ‘’Holland Crime Boulevard’’./ZËRI
