GREQI- Një 37-vjeçar shqiptar është arrestuar nga Policia greke në zonën e Ajos Pandeliomonas në Athinë. Mësohet se në pranga ka rënë Faiken Maze, i cili u kap teksa lëvizte i armatosur me pistoletë në brez. Arrestimi i tij ka ndodhur në një prej lagjeve që konsiderohet si ndër më të rrezikshmet në Greqi sa i takon kriminalitetit.
Sipas mediave greke, Policia i kërkoi Mazes të kryente një verifikim të dokumenteve të tij, por kur e thirrën për kontroll, ai bëri sikur nuk i kishte parë dhe hyri në një dyqan duke u përpjekur të arratisej. Megjithatë nuk ia doli dot që t'i shpëtonte prangave të Policisë së Shtetit grek.
Gjatë kontrollit, iu gjet dhe iu sekuestrua një pistoletë dhe 13 fishekë të kalibrit 9mm.
Policia dyshon se Maze do të kryente ndonjë grabitje në dyqanet e zonës, por nuk përjashtohet mundësia që të ishte nisur për të kryer ndonjë vrasje. 37-vjeçari me dosjen e ngritur ndaj tij nga Departamenti i Sigurisë së Shën Panteleimonit është dërguar për t'u përballur me drejtësinë./ZËRI
