TIRANË- Gjykata e Apelit dënoi me 1 vit burg deputetin e Partisë Demokratike, Ervin Salianji, e sot Prokuroria e Tiranës ka dërguar shkresën në Kuvend. Siç duket edhe nga pamjet e mëposhtme, dy zyrtarë të Prokurorisë shkojnë në Kuvend për të depozituar kërkesën për arrestimin e deputetit të PD-së. Kështu që pritet nisja e procedurave për ndërprerjen e mandatit të deputetit. Por teksa Partia Demokratike kërkon mbledhjen e Këshillit për Mandatet dhe Rregulloren, por ka gjasa që kryeparlamentarja Elisa Spiropali të mos e pranojë kërkesën e opozitës.
Gjykata e Apelit la dje në fuqi vendimin e shkallës së parë të Gjykatës së Tiranës, që e dënoi deputetin e Partisë Demokratike me 1 vit burg, për akuzën e kallëzimit të rremë për dosjen ‘Babalja’. Vendimi i Gjykatës së Apelit i hap rrugë arrestimit të Salianjit, i cili pritet të vuajë dënimin në një burg të sigurisë së zakonshme. Salianji humb në mënyrë të menjëhershme mandatin e deputetit, për shkak se vendimi i Apelit ekzekutohet pa vonesa, edhe pse politikani demokrat, mund ta apelojë çështjen në Gjykatën e Lartë. Neni 71, pika 2, shkronja dh, e Kushtetutës, thotë se mandati i deputetit mbaron ose është i pavlefshëm kur dënohet me vendim gjyqësor të formës së prerë për kryerjen e një krimi.
Gjykata e Shkallës së Parë vendosi se audio-përgjimi ishte inskenim dhe i shpalli fajtorë të 4 të pandehurit Fredi Alizoti, Albert Veliun, Jetmir Olldashin si dhe Ervin Salianjin. Në këtë mënyrë merr fund dhe karriera në ngjitje e Salianjit, i cili së fundi ishte caktuar drejtues politik i PD-së për qarkun e Elbasanit. Dënimi e pengon Salianjin që për 5 vitet e ardhshme të ushtrojë detyra publike./ZËRI
