KORÇË- Zëvendësministri i Brendshëm i Greqisë Kostas Gjolekas ka zhvilluar një vizitë në Korçë ku ka bërë deklarata për praninë historike të grekëve në këtë qytet. Gjatë qëndrimit në juglindje të Shqipërisë ai u shoqërua nga një delegacion me përfaqësues të biznesit, pushtetit vendor dhe universiteteve të Greqisë Veriore.
Në një takim me Mitropolitin Anastasios Gjolekas u shpreh se Korça duhet të jetë pjesë e vizitave të grekëve që dëshirojnë të njohin, sipas tij, rrënjët historike të popullit grek. “Çdo grek duhet të kalojë edhe nëpër Korçë, për të parë rrënjët e popullit tonë që ishte këtu e që vazhdon të jetë këtu”, tha ai.
Gjatë bisedës, Gjolekas vlerësoi edhe rëndësinë historike të Kishës së Korçës, duke theksuar se vizita në këtë objekt u jep mundësi grekëve të njihen nga afër me trashëgiminë e saj.
Në kuadër të vizitës, zëvendësministri dhe delegacioni që e shoqëronte u ndalën edhe në godinën historike të Konsullatës Greke në Korçë. Aty Gjolekas zhvilloi një takim me konsullin Asterios Buzias.
Programi i qëndrimit në qytet përfshiu gjithashtu takime me anëtarë dhe përfaqësues të pakicës etnike greke në Korçë./ZËRI
