TIRANË-Ngrirja e fondeve të USAID-it, ka prekur tanimë edhe Shqipërinë. Nga projekti “Justice for all” janë larguar ndihmësit ligjorë nga Gjykata e Lartë, raporton gazetari Arsen Rusta. Prej afro 4 ditësh ata kanë ndërprerë punën dhe kanë dorëzuar zyrat dhe pajisjet. Ata ishin rekrutuar nga KLGJ dhe ambasada për të ndihmuar gjyqtarët e lartë. Në total janë mbi 50 persona që deri më tani kanë ndalur punën. Më konkretisht janë larguar ndihmësit në KLGJ, KLP, SPAK, si dhe ndihmësit ligjorë në Gjykatën e Apelit.
“Prej 4 ditësh, anëtarët e ndihmësit ligjorë në Gjykatën e Lartë, ndihmës ligjorë në Gjykatat e Apelit, stafi mbështetës në KLGJ, KLP, por edhe pranë SPAK, tashmë kanë pezulluar detyrën, janë larguar duke dorëzuar zyrat dhe pajisjet e punës, laptop dhe mjete të tjera, përfshirë telefona celularë, duke krijuar një ngërç në sistemin e drejtësisë. Në Gjykatën e Lartë ndikimi është mjaft i madh, është projekti ‘Justice for all’ që nëpërmjet ambasadës së SHBA-ve dhe KLGJ-së firmosën një memorandum bashkëpunimi, ku ndihmësit ligjorë do të ndihmonin gjyqtarët për të përshpejtuar ecjen me dosjet e mbetura, afro 39 mijë dosje. Ata do shqyrtonin cilat dosje ishin me përparësi, mangësi dokumentesh, apo cila duhet të kalojë për shqyrtim nga gjyqtarët. Në Gjykatën e Lartë ishin 9 të kontraktuar, që kishin filluar punën prej 8 muajsh. Stafi mbështetës pranë SPAK-ut, një përfaqësues i cili ka qenë projekt i ‘Justice for all’. po ashtu është larguar. Flitet se ka patur largime edhe ONM-ja, shefi i tyre ka lënë Shqipërinë, por kjo mbetet për t’u verifikuar. 50 persona kanë pezulluar punën. E-maili që kanë marrë nga ambasada amerikane është që menjëherë duhet të ndërpresin punën. A do ta rikuperojë buxheti i shtetit këtë vakancë, kjo mbetet për t’u parë"-deklaroi gazetari Arsen Rusta për MCN Live.
Çfarë ndodhi?
Miliarderi amerikan Elon Musk, i cili u emërua në krye të Departamentit të Efikasitetit të Qeverisë (DOGE), ka marrë një masë drastike, ku ka bindur presidentin amerikane Donald Trump që të "mbyllë" USAID-in, Agjencinë Amerikane për Zhvillim Ndërkombëtar. Musk ka akuzuar USAID për korrupsion, pasi sipas tij me fondet që ka shpërndarë. Sipas Musk, organizata ka përdorur 20 milionë dollarë për të korruptuar gazetarë, në mënyrë që të gërmojnë papastërti mbi politikanë. Musk ka akuzuar USAID dhe për krijimin e një organizate kriminale; e gjithashtu dërgoi 53 milionë dollarë për Aleancën EcoHealth, e cila më pas përdori fondet e taksapaguesve amerikanë për të mbështetur kërkimin fitimprurës mbi koronaviruset në laboratorin e Wuhan-it, kërkime që ka të ngjarë të çojnë në krijimin e COVID-19.
Pjesë e "projekteve" të USAID ishte dhe Shqipëria. Aktivistja Merissa Hansen ka nxjerr një dokument ku vërteton se fondet e kësaj agjencie, që duhet të shkonin për të ndihmuar Palestinën, në fakt shkuan për miliarderin George Soros. Sipas Hansen, Soros i ka përdorur këto fonde nëpërmjet fondacionit të tij 'Shoqërisë së Hapur' për të ndikuar në politikën shqiptare dhe në Maqedoninë e Veriut. Aktualisht, fondet e USAID janë ndërprerë në të gjithë botën, përfshirë edhe Shqipërinë, përmes së cilës merrnin fonde një sërë institucionesh shtetërore. Një gjë e tillë ka ndodhur edhe në uebsajtin e Ambasadës Amerikane në Shqipëri, ku tashmë është fshirë e gjithë përmbajtja lidhur me USAID-in./ZËRI
