TIRANË- Të shtëna me armë zjarri janë regjistruar këtë mbrëmje në Rinas. Sipas Policisë, personi që ka qëlluar drejt efektivëve është Klajdi Buza, 34 vjeç, i cili po qarkullonte i armatosur dhe gjatë ndalimit, qëlloi drejt tyre. Fatmirësisht asnjë oficer policie nuk u lëndua nga ky sulm. Buza u arrestua menjëherë nga autoritetet, por rezulton një person me precedentë të mëparshëm penal.
Ai është arrestuar në vitin 2022 pasi po qarkullonte i armatosur në rrugët e qytetit të Krujës. Ndërsa në vitin 2015, ai ka denoncuar se atij i kanë vjedhur një makinë tip “BMW X5”.
Makina e tij u gjet asokohe e braktisur në një zonë të quajtur Ura e Gjoles në Fushë Krujë.
“Qëlloi drejt Punonjësve të Policisë, gjatë një aksioni policor për kapjen e tij, vihet në pranga 34-vjeçari. 34-vjeçari me precendent kriminal në fushën e armëmbajtjes pa leje. Sekuestrohen arma e zjarrit dhe municion luftarak. Shërbimet e Forcës Operacionale të DVP Tiranë pasi kanë marrë informacion për një shtetas i cili mbante armë zjarri në subjektin e tij kanë organizuar punën me qëllim kapjen dhe vënien përpara përgjegjesisë ligjore. Gjatë ndalimit të shërbimeve të Policisë në subjektin e tij privat në Rinas, shtetasi i identifikuar me inicialet K. B, ka qëlluar në drejtim të Policisë nga brenda subjektit të tij.
Nga të shtënat nuk ka patur të lënduar. Shërbimet e Policisë kanë bërë të mundur neutralizimin e tij dhe shoqërimin për në ambientet e DVP Tiranë. Në përfundim të veprimeve specialistët për Hetimin e Krimeve të Rënda kanë bërë arrestimin e shtetasit K. B., 34 vjeç, banues në Tiranë.
Në cilësinë e provës materiale u sekuestrua arma e zjarrit dhe municion luftarak. Materialet i kaluan Prokurorisë, për veprime të mëtejshme procedurale”, njofton Policia./ZËRI
