TIRANË- Të shkarkuarit e Erion Veliajt duket se nuk po largohen nga Bashkia e Tiranës vetëm me sendet personale, por edhe me mobiliet e zyrave.
Në një foto të siguruar nga ZËRI, shihet një kamion transporti mbi të cilin qëndrojnë divanët që ndodheshin brenda ambienteve, zyrave të Bashkisë së Tiranës.
Kjo pamje vjen pikërisht në mes të 'stuhisë' së shkarkimeve që ka përfshirë ditët e fundit Bashkinë e Tiranës, me vendim dhe firmë të kryebashkiakut Erion Veliaj nga qelia e paraburgimit.
Këtë të mërkurë kryebashkiaku Erion Veliaj shkarkoi nga detyra nënkryetarin e Bashkisë, Blendi Sulaj, i cili ishte emëruar në këtë post në vitin 2025. Më herët, më 28 gusht, Erion Veliaj, përmes një vendimi të firmosur nga qelia, shkarkoi nga detyra kryetaren e komanduar të Bashkisë së Tiranës, Anuela Ristanin.
Ndërsa një ditë më parë, 31 gusht, dha dorëheqjen sekretari i Përgjithshëm i Bashkisë, Eldi Hoxha. Në vend të tij, kryebashkiaku Veliaj komandoi Alban Dokushin si sekretar të Përgjithshëm, pas vendimit të Gjykatës Kushtetuese për rikthimin e tij në detyrë. Dokushi më 21 Mars 2025 u shkarkua nga kryetarja e komanduar e bashkisë, Anuela Ristani.
Nga 28 gushti në Bashkinë e Tiranës nuk ka një drejtues të deleguar që të qëndrojë në krye të punëve, teksa kryebashkiaku Veliaj ndodhet në paraburgim prej 10 shkurtit 2025./ZËRI
