'Shkeli barazinë në tendera'/ SPAK merr të pandehur Plarent Ndrecën! Deputeti i PS dërgon avokatin në SPAK

Plarent Ndreca

TIRANË- Ende nuk ka asnjë njoftim zyrtar, por Prokuroria e Posaçme kundër Korrupsionit dhe Krimit të Organizuar ka përfunduar hetimet për deputetin e Partisë Socialiste Plarent Ndreca. Ky i fundit është marrë i pandehur për veprën penale "shkelja e barazisë në tendera", për të cilën nëse shpallet e fajshëm, dënohet me burgim gjer në 3 vjet. Hetimet e SPAK janë fokusuar në procedurat për rikonstruksionin e 4 komisariateve në kohën kur Ndreca ishte sekretar i Përgjithshëm i Ministrisë së Brendshme.

Sot, Ndreca duhet të njihej zyrtarisht me mbylljen e hetimeve, por në SPAK ka shkuar avokati i tij, Ermal Yzeiraj. Arsyeja përse Ndreca nuk shkoi vetë të njihej me akuzën e ngritur ndaj tij ende nuk është bërë me dije nga socialisti.

"Më dt.25.10.2024, të pandehurit, Plarent Ndreca, i është komunikuar, përmes avokatit të tij, përfundimi i hetimeve për procedimin penal nr.240/2021 për veprën penale “Shkelje e barazisë së pjesëmarrësve në tendera apo ankande publike”, parashikuar nga nenet 258 dhe 25 të Kodit Penal. Më shumë detaje do të vijojnë në një moment të dytë,"- njoftoi SPAK.

Por përveç tij, akuza u është komunikuar edhe disa zyrtarëve të tjerë si dhe anëtar të komisionit të vlerësimit të ofertave. Megjithatë emrat e tyre dhe më shumë detaje nga dosja pritet të mësohen pasi SPAK të bëjë njoftimin zyrtar. Kallëzimi në SPAK u bë nga Kontrolli i Lartë i Shtetit, institucion që ngriti dyshimet se zyrtarët e Ministrisë së Brendshme por edhe të KVO-së kishin lejuar mospërputhje dhe devijime ligjore në garën për ndërhyrje në Komisariatet e Vlorës, Mirditës, Pogradecit dhe atij nr. 4 në Tiranë.

Në vitin 2019, Ndreca zhvilloi disa tendera për rindërtimin e komisariateve të policisë në rrethe të ndryshme të vendit. Pas një auditimi të bërë nga Kontrolli i Lartë i Shtetit, vetë KLSH-ja bëri një kallëzim në SPAK. Për pasojë, në pyetje është marrë edhe ish-ministri i Brendshëm, Sandër Lleshaj, i cili ka qenë në detyrë në kohën që janë kryer këto procedura. Lleshaj është pyetur si person në dijeni. Ndreca është akuzuar edhe nga Opozita.

Kreu i Grupit Parlamentar të Partisë Demokratike, Gazment Bardhi ka deklaruar më herët se Ndreca është nën hetim nga SPAK për shkelje të ligjit në tenderin e rikonstruksionit të disa komisariateve. Sipas Bardhit, Ndreca ka paracaktuar fituesin e tenderit dhe ka rritur fiktivisht vlerat e prokurimeve. Po ashtu, eksponenti tjetër i Partisë Demokratike, Belind Këlliçi lajmëroi se do të dorëzonte një tjetër kallëzim në SPAK për Ndrecën. Kësaj here socialisti akuzohet për fshehje pasurie./ZËRI

Në përputhje me standarded JTI