TIRANË- Biznesmeni dhe investitori Behgjet Pacolli ka reaguar pas vendimit të Ministrisë së Infrastrukturës dhe Energjisë për nisjen e procedurës për zgjidhjen e kontratës së koncesionit për Aeroportin Ndërkombëtar të Vlorës.
Përmes një postimi në rrjete sociale, Pacolli, i cili është aksioner i kompanisë "MABCO", thotë së kompania ka marrë asnjë njoftim zyrtar lidhur me këtë vendim. Pacolli pretendon se kompania e tij ka investuar mbi 320 milionë euro dhe se aeroporti ndodhej pranë fazës së certifikimit, por thekson se është penguar që të futet në kantier.
Sipas biznesmenit, nëse procedura e nisur nga ministria konfirmohet, Shqipëria po e çon çështjen drejt arbitrazhit ndërkombëtar. Pacolli akuzon disa përfaqësues të institucioneve shtetërore për neglizhencë dhe veprime që i konsideron të paligjshme, ndërsa paralajmëron se MABCO do të përdorë të gjitha mjetet juridike për mbrojtjen e investimit të saj.
Postimi i plotë i Pacolli:
Aeroporti i Vlores/Sot Ministria e Infrastrukturës dhe Energjisë ka nisur procedurën për zgjidhjen e Kontratës së Koncesionit të Aeroportit Ndërkombëtar të Vlorës. Deri në këtë moment, MABCO Constructions SA nuk ka marrë asnjë njoftim zyrtar nga Autoriteti Kontraktor. Për një investim strategjik me rëndësi kombëtare, është e papranueshme që investitori të informohet nga mediat dhe jo nga institucionet shtetërore.
Nëse ky lajm rezulton i vërtetë, atëherë shteti shqiptar po zgjedh me vetëdije rrugën e arbitrazhit ndërkombëtar. MABCO ka bërë çdo përpjekje për ta shmangur këtë skenar dhe për të gjetur një zgjidhje institucionale. Fatkeqësisht, përballë papërgjegjshmërisë, heshtjes dhe veprimeve të paligjshme të disa përfaqësuesve shtetërorë, çdo mundësi për zgjidhje është mbyllur.
Ky arbitrazh do të jetë pasojë e drejtpërdrejtë e neglizhencës, veprimeve të kundërligjshme dhe papërgjegjshmërisë së disa përfaqësuesve të institucioneve shtetërore, e veprimeve të elementëve që, nën mbulesën e institucioneve, kanë vepruar jashtë ligjit, si dhe e dështimit të një sistemi drejtësie të ndikuar për të garantuar zbatimin e ligjit dhe mbrojtjen e të drejtave të investitorit.
Nuk kam dëshiruar kurrë që taksapaguesit shqiptarë të paguajnë faturën e neglizhencës, papërgjegjshmërisë dhe vendimeve të paligjshme të zyrtarëve që sot vazhdojnë të sillen me indiferencë, sepse ata nuk mbajnë asnjë përgjegjësi personale. Dëmin nuk e paguajnë ata, por qytetarët shqiptarë dhe biznesi.
MABCO është ekspozuar financiarisht me mbi 320 milionë euro, pa përfshirë humbjen e fitimit dhe kostot ligjore. Kompania kishte përfunduar pothuajse të gjitha detyrimet kontraktore dhe ndodhej vetëm pak para fazës së certifikimit të aeroportit.
Megjithatë, pas vendimit të Gjykatës së Lartë, grupe që veprojnë në mënyrë arbitrare dhe jashtë ligjit, me mbështetje ose tolerim institucional, penguan MABCO-n të hynte në kantier dhe të përfundonte projektin. Për muaj të tërë, në prani të Policisë së Shtetit, investitori u mbajt jashtë pronës së tij, ndërsa pajisje me vlerë u dëmtuan, u shkatërruan dhe një pjesë edhe u vodhën.
Paradoksi është i qartë: nga njëra anë institucionet penguan përfundimin e projektit, ndërsa nga ana tjetër kërkojnë ta përdorin këtë pengesë si arsye për zgjidhjen e kontratës.
Kjo bie ndesh me vendimin e Gjykatës së Lartë, me Kontratën e Koncesionit, me Marrëveshjen Dypalëshe për Mbrojtjen e Investimeve ndërmjet Zvicrës dhe Shqipërisë dhe me parimin universal të së drejtës se askush nuk mund të përfitojë nga sjellja e vet e paligjshme.
Nëse procedura konfirmohet, MABCO do të mbrojë të drejtat e saj me të gjitha mjetet juridike, përfshirë provat dhe faktet qe posedon kunder seicilit qe ka shkaktuar këtë skandal të turpshëm e deri të ARBITRAZHI tregtar ndërkombëtar kundër Republikës së Shqipërisë.
Ky nuk është një kërcënim. Është pasoja juridike e veprimeve joligjore dhe mosveprimeve të papërgjegjshme të përfaqesuesve të institucioneve shtetërore.
Ministria e Infrastrukturës dhe Energjisë ka nisur procedurat për anulimin e koncesionit të Aeroportit të Vlorës, duke argumentuar mospërmbushjen e detyrimeve kontraktuale dhe tejkalimin e afateve për përfundimin e punimeve.
Punimet duhej të përfundonin në shkurt 2026, ndërsa kontrata parashikonte edhe 90 ditë shtesë, por aeroporti nuk u përfundua brenda afatit. Shkak për vonesat u bënë mosmarrëveshjet mes kompanive koncesionare “MABCO” dhe “2A Group”.
Më 3 qershor, ministri Enea Karakaçi u kishte dhënë palëve 30 ditë kohë për zgjidhjen e konfliktit, por mosmarrëveshjet u thelluan. Përplasjet mes dy kompanive koncesionare janë shoqëruar edhe me incidente në kantier. Në disa raste, përfaqësuesit dhe punonjësit e dy kompanive janë përplasur mes tyre, duke krijuar situata tensioni dhe duke penguar vijimin normal të punimeve.
Ndërkohë, mësohet se kompanive u janë vendosur edhe gjoba për vonesat.
Fati i mëtejshëm i Aeroportit të Vlorës do të përcaktohet pas përfundimit të procedurave për zgjidhjen e kontratës koncesionare./ZËRI
