PRISHTINË- Qindra qytetarë janë mbledhur mbrëmjen e së premtes në Prishtinë në një protestë kundër vendimit të Dhomave të Specializuara në Hagë ndaj ish-krerëve të Ushtrisë Çlirimtare të Kosovës.
Protesta është zhvilluar në sheshin 'Skënderbeu', ku janë bashkuar qytetarëveterane të UÇK-së dhe familjarë të ish-drejtuesve të dënuar. Protestuesit kanë shprehur kundërshtimin ndaj aktgjykimit të shpallur më 16 shtator dhe kanë kërkuar që çështja të vijojë nëpërmjet procedurave të apelimit.
View this post on Instagram
Tubimi vjen pas protestës së organizuar më herët gjatë ditës nga Organizata e Veteranëve të Luftës së UÇK-së. Në atë protestë u artikuluan edhe kërkesa për ndryshimin ose shfuqizimin e ligjit për Dhomat e Specializuara, mbështetje financiare për mbrojtjen e ish-krerëve dhe angazhimin e ekspertëve ndërkombëtarë.
Në shesh janë dëgjuar thirrje në mbështetje të ish-krerëve të UÇK-së, ndërsa protestuesit kanë mbajtur flamuj dhe simbole të UÇK-së.
Protestat në Prishtinë vijojnë pas vendimit të Hagës ku Hashim Thaçi, Kadri Veseli, Jakup Krasniqi dhe Rexhep Selimi u dënuan për vepra të lidhura me krime lufte./ZËRI
