DURRËS- Një ngjarje e rëndë ka ndodhur në Durrës, ku një punonjës i kompanisë “Banaking” është aksidentuar në vendin e punës dhe ka humbur shikimin në njërin sy. Burime i thanë ZËRI se incidenti ka ndodhur teksa punonjësi ishte duke hapur arkat e bananeve në kontenier dhe në një moment bisturia i ka shkarë nga dora dhe e ka dëmtuar në sy. Edhe pse është dërguar me urgjencë në spital, punëtori e ka humbur shikimin në njërin sy.
Kompania ka marrë gjobë të lartë nga inspektoriati i punës, për shkak se punonjësi ishte punësuar pa dokumentin përkatës. Punonjësi nuk kishte nënshkruar një kontratë ku njihej me risqet në punë dhe kjo ka sjellë gjobitjen e Bana King.
ZËRI ka tentuar që të kontaktojë me kompaninë, por ka qenë e pamundur. Nga rrugë jo zyrtare mësohet se firma “Zico” e Trifon Muratajt, e ka dërguar vetë në një spital privat punonjësin, por nuk është pranuar.
Duke qenë se punonjësi është dërguar (me detyrim) në një spital publik është vënë në dijeni edhe Policia e Shtetit, të cilët kanë nisur hetimet. Por sërish nuk kanë asnjë njoftim zyrtar lidhur me masat që kanë marrë për të zbardhur ngjarjen. ZËRI ka kontaktuar me Policinë e Tiranës dhe të Durrësit, por ende nuk ka marrë asnjë sqarim.
Deri më tani nga Policia nuk është zbuluar asnjë detaj, as për gjobën, as për një sqarim tjetër. Aktualisht punonjësi ndodhet te spitali Francez në kryeqytet ku po merr ndihmën e parë nga mjekët./ZËRI
