TIRANË- Asnjë gjyqtar i Gjykatës Kushtetuese nuk është vendosur në përgjim nga Struktura e Posaçme kundër Korrupsionit dhe Krimit të Organizuar. Për këtë, ka qenë vetë kreu i SPAK, Altin Dumani, ai që ka sqaruar kryetaren në largim të Gjykatës Kushtetuese, Holta Zaçaj.
Një pjesë nga shkresa që Dumani ka dërguar pranë Kushtetueses, e siguruar nga "BoldNews", ka rrëzuar të gjitha prentendimet e ngritura në media. Dje, BIRN, raportoi se një dokument i rrjedhur në media sugjeron se Prokuroria e Posaçme Kundër Krimit të Organizuar dhe Korrupsionit urdhëroi të kryhej midis datave 10 shkurt dhe 25 shkurt përgjimi në vende publike i anëtarit të Gjykatës Kushtetuese, Gent Ibrahimi, pasi kishte informacione se persona të interesuar kishin ndikuar te ai për mënyrën e formulimit të arsyetimit të vendimit të Gjykatës Kushtetuese ndaj një ankimi të biznesmenit Pëllumb Gjoka.
"Sipas dokumentit të rrjedhur në media, arsyetimi në favor të Gjokës nga Gjykata Kushtetuese do të përdorej edhe në mjaft gjykime të tjera të ngjashme, të bazuara në të dhënat e marra nga aplikacioni Sky ECC, pasi vendimmarrja e Gjykatës Kushtetuese është praktikë e detyrueshme për institucionet e tjera të drejtësisë,"-shkruan BIRN.
Duke qenë se i njëjti pretendim është përsëritur disa herë, kreu i SPAK ka sqaruar vetë me anë të një shkrese Holta Zaçajn. Në shkresën e kreut të SPAK-ut përmenden dy detaje: një, që së pari nuk ka kallëzim ndaj ndonjë gjyqtari të GJK-së, dhe së dyti, asnjë gjyqtar kushtetues nuk është “person nën hetim”.
PJESË NGA LETRA:
Megjithatë, në përgjigje të interesit të institucionit tuaj mundet t'ju konfirmojmë se në Prokurorinë e Posaçme nuk është paraqitur asnjë kallëzim penal nga ndonjë prej gjyqtarëve të Gjykatës Kushtetuese, si dhe ju konfirmojmë se nuk është me statusin "person nën hetim" asnjë prej gjyqtarëve të Gjykatës Kushtetuese. Nga ana tjetër ju bëjmë me dije se Prokuroria e Posaçme, bazuar në nenet 148 dhe 148/dh të Kushtetutës si dhe nenet 24, 75/a dhe 277 e vijues të Kodit të Procedurës Penale, ka juridiksionin dhe kompetencën që të ushtrojë ndjekjen penale për sjelljet jashtëgjyqësore të gjyqtarëve të çdo niveli, nëse ekzistojnë dyshime se mundet të jetë kryer vepra penale "korrupsioni pasiv i gjyqtarëve, prokurorëve dhe funksionarëve të tjerë të organeve të drejtësisë" të parashikuar nga neni 319/ç i Kodit Penal apo çdo vepër penale tjetër që mundet të jetë kryer nga personat që përfshihen në rrethin e subjekteve të parashikuar në nenin 75/a, shkronja (c) të Kodit të Procedurës Penale.
Pra në sqarimin e tij, kreu i SPAK thekson edhe njëherë se Prokuroria e Posaçme që ai drejton nuk ka kompetencë për të kontrolluar vendimet e gjyqtarëve në çështjet konkrete, si të gjykatave të zakonshme, ashtu edhe të Gjykatës Kushtetuese.
“Prokuroria e Posaçme ka juridiksionin dhe kompetencën që të ushtrojë ndjekjen penale për sjelljet jashtëgjyqësore të gjyqtarëve të çdo niveli, nëse ekzistojnë dyshimet se mundet të kenë kryer veprën penale të “korrupsionit pasiv…” ose të çdo vepre tjetër penale…”.
Pas sqarimit të bërë nga vetë kreu i SPAK, edhe Gjykata Kushtetuese ka dalë me një njoftim zyrtar, duke theksuar se ekonsideron çështje me rëndësi, ndaj edhe kërkon që të jetë transparente me publikun. Në deklaratën zyrtare, Gjykata Kushtetuese sqaron se ashtu si deri më tani, trupa gjykuese do të vijojë të ushtrojë kompetencat e saj me korrektësi, integritet dhe e pavarur; pa u ndikuar nga ndonjë presion i jashtëm.
"Gjykata, duke pranuar rëndësinë që ka në një shtet të së drejtës ushtrimi i kompetencave të çdo organi publik në respektim të kornizës kushtetuese dhe asaj ligjore, dëshiron të theksojë se ajo, sikundër ka vepruar deri më tani, do të vijojë të ushtrojë kompetencat e saj me korrektësi, integritet dhe e pavarur ndaj çdo ndikimi apo presioni të jashtëm,"-sqaron ndër të tjera Gjykata Kushtetuese.
Njoftim për Shtyp i Trupës së Gjykatës Kushtetuese
Gjykata Kushtetuese, nisur nga debati mediatik i ditëve të fundit, për vënien nën përgjim nga Prokuroria e Posaçme të një gjyqtari kushtetues, që lidhet me ushtrimin e veprimtarisë së tij, konsideron me rëndësi që të sqarojë opinionin publik se në ushtrimin e misionit kushtetues për garantimin e epërsisë së Kushtetutës, ajo udhëhiqet nga parimet e kolegjialitetit, pavarësisë dhe paanësisë, të sanksionuara në ligjin themelor. jykata është e vetëdijshme për ndikimin që ka veprimtaria dhe forca e autoritetit të saj ndaj aktorëve politikë dhe institucionalë, ndaj medias, palëve në proces, ashtu edhe ndaj opinionit publik. Për këto arsye, Gjykata ndjek rregullat e transparencës në vendimmarrje, me qëllim krijimin dhe ruajtjen e besimit publik ndaj saj.
Gjykata ka shprehur edhe më parë bindjen se ushtrimi i veprimtarisë në një klimë besimi nga kushdo i shërben forcimit të autoritetit të saj si organ kushtetues i pavarur, ndaj ka ngritur shqetësimin rreth keqinterpretimeve dhe përpjekjeve për ta përfshirë atë në debate të veshura nën petkun e diskurseve juridike për të paragjykuar vendimmarrje konkrete dhe për të ndërhyrë në pavarësinë e saj. Pa dashur të bëhet pjesë e asnjë diskursi mediatik, Gjykata vlerëson të theksojë se procesi vendimmarrës në ushtrimin e funksionit për dhënien e drejtësisë kushtetuese bazohet në parimet dhe procedurat e parashikuara nga korniza kushtetuese dhe ligjore, duke qenë çdo vendimmarrje rezultat i një procesi diskutimesh të mendimeve dhe qëndrimeve të secilit gjyqtar kushtetues, sipas bindjes së tij të brendshme, për të cilat gëzon imunitet të garantuar nga Kushtetuta në ushtrim të funksionit të tij. Gjykata, duke pranuar rëndësinë që ka në një shtet të së drejtës ushtrimi i kompetencave të çdo organi publik në respektim të kornizës kushtetuese dhe asaj ligjore, dëshiron të theksojë se ajo, sikundër ka vepruar deri më tani, do të vijojë të ushtrojë kompetencat e saj me korrektësi, integritet dhe e pavarur ndaj çdo ndikimi apo presioni të jashtëm./ZËRI
