LEZHË- Në portin e Shëngjinit mbërritën 40 emigrantë të paligjshëm, të cilët janë ndaluar në Itali dhe do të qëndrojnë në kampin e Gjadrit. Sipas një dekreti të miratuar nga qeveria e kryeministrës italiane Giorgia Meloni, qendrat pritëse në Gjadër do të përdoren për emigrantët e paligjshëm që janë në pritje të dëbimit.
Ministri i Brendshëm italian, Matteo Piantedosi dekreti i fundit vetëm “riaktivizoi një funksioni ekzistues të qendrës, atë të qendrës së kthimit”.
Me këtë vendim, emigrantët e ndaluar në Gjadër mund të qëndrojnë aty deri në 18 muaj, derisa vendet e tyre të origjinës të pranojnë kthimin e tyre.
Emigrantët e paligjshëm, do të qëndrojnë në Shqipëri në pritje të dëbimit, por duhet të kthehen në Itali për kthimin e tyre përfundimtar në vendet e origjinës. Në një tentativë për t’i hapur qendrat, më 28 mars, qeveria italiane miratoi një dekret të ri, i cili e lejon përdorimin e këtyre strukturave për të strehuar emigrantë pa dokumente që ndodhen aktualisht në Itali, dhe ndaj të cilëve është lëshuar urdhër dëbimi.
Deri më tani qendrat pritëse ishin bosh, pasi në nëntor emigrantët, dhe pjesa më e madhe e policëve italianë, punonjësve socialë dhe organi drejtues i qendrave në Shqipëri për riatdhesimin e emigrantëve u larguan nga Gjadri. Vendimi erdhi pas bllokimit të njëpasnjëshëm të Gjykatës së Romës për mbajtjen e emigrantëve në qendrën e Gjadrit.
Marrëveshja me Italinë për emigrantët u nënshkrua në muajin nëntor të vitit të kaluar dhe më pas u ratifikua nga të dyja parlamentet ndërsa në vendin tokë u kërkua edhe një aprovim i gjykatës kushtetuese. Kapaciteti maksimal i numrit që do të presë qendra në Shqipëri nuk mund të jetë më shumë se 3 mijë emigrantë në muaj dhe në përfundim të procedurave të vlerësimit autoritetet italiane do të largojnë me shpenzimet e tyre refugjatët nga territori shqiptar./ZËRI
