TIRANË- Prokuroria e Posaçme kundër Korrupsionit dhe Krimit të Organizuar ka bërë një sqarim në lidhje me cilësimin e kryebashkiakut Erion Veliaj si "i dënuar". Në shkresën zyrtare, SPAK informon publikun se dokumenti që e nxjerr gjendjen gjyqësore të Veliajt si “të dënuar” është lëshuar nga Drejtoria e Përgjithshme e Burgjeve. Prokuroria e Posaçme sqaron ka një certifikatë elektronike të gjendjes gjyqësore, e cila është gjeneruar nga Drejtoria e Përgjithshme e Burgjeve dhe që përmban informacionin se Veliaj është shënuar si i dënuar. Pra nuk është SPAK "përgjegjësja" për nxjerrjen e këtij statusi.
Pavarësisht këtij detaji, SPAK sqaron se ky informacion nuk është përdorur për të justifikuar masën shtrënguese të sigurisë për kryebashkiakun. Por sërish kërkojnë më shumë informacione nga Drejtoria e Përgjithshme e Burgjeve.
"Prokuroria e Posaçme i ka kërkuar informacion Drejtorisë së Përgjithshme të Burgjeve në lidhje me veprat penale si dhe vendimet gjyqësore, të cilat lidhen me certifikatën elektronike që është gjeneruar. Me shkresën nr. 2215/1 datë 12.02.2025, Drejtoria e Përgjithshme e Gjendjes Gjyqësore ka sqaruar mes të tjerash se: “…çdo herë kur printohet Vërtetimi i Gjendjes Gjyqësore me shënime, del dhe statusi i dënuar si në këtë rast. Shtetasi E. L. V. ka 3 vendime pafajësie,"-sqaron SPAK.
Drejtoria e Përgjithshme e Burgjeve në përgjigje për Prokurorinë e Posaçme zyrtarisht deklaron se Erion Veliaj rezulton i padënuar.
"Në përgjigje të interesimit të mediave, Drejtoria e Përgjithshme e Burgjeve bën me dije se, në përgjigje të kërkesës së Prokurorisë së Posaçme Kundër Korrupsionit dhe Krimit të Organizuar, me shkresën nr. 2215/prot., datë 12.02.2025, ka përcjellë vërtetimin e gjendjes gjyqësore për shtetasin E. V., i biri i L. dhe Sh., lindur më 17.12.1979. Pas verifikimeve në Regjistrin e Gjendjes Gjyqësore, ai rezulton i padënuar dhe ndaj tij janë dhënë tre vendime pafajësie. Sqarojmë se, në rastet kur kërkohet vërtetimi me historik, përfshihen edhe të dhënat mbi vendimet e mëparshme, përfshirë pafajësitë apo vendimet e rehabilitimit, në përputhje me legjislacionin në fuqi”, njofton Drejtoria e Burgjeve.
NJOFTIMI I SPAK:
Në lidhje me pretendimet e shtetasit nën hetim E.V sa i takon gjendjes së tij gjyqësore, Prokuroria e Posaçme kundër Korrupsionit dhe Krimit të Organizuar sqaron se: Në kërkesën për “Caktimin e masës shtrënguese të sigurimit personal”, drejtuar Gjykatës së Posaçme të Shkallës së Parë për Korrupsionin dhe Krimin e Organizuar për shtetasin nën hetim E.V, me numër protokolli 2402, datë 24.01.2025, Prokuroria e Posaçme nuk i është referuar për asnjë moment gjendjes së tij gjyqësore. Si pjesë e akteve të depozituara pranë Gjykatës së Posaçme është edhe një certifikatë elektronike e gjendjes gjyqësore me nr. prot. 5488 datë 23.01.2025, e gjeneruar nga sistemi i Drejtorisë së Përgjithshme të Burgjeve, ku organi procedues ka akses. Kjo certifikatë, në brendësi të saj përmban informacionin se shtetasi E.V, i biri i L. dhe Sh., lindur më 17.12.1979 në Tiranë, rezulton “i dënuar”.
Në lidhje me këtë certifikatë, Prokuroria e Posaçme i ka kërkuar informacion Drejtorisë së Përgjithshme të Burgjeve në lidhje me veprat penale si dhe vendimet gjyqësore, të cilat lidhen me certifikatën elektronike që është gjeneruar. Me shkresën nr. 2215/1 datë 12.02.2025, Drejtoria e Përgjithshme e Gjendjes Gjyqësore ka sqaruar mes të tjerash se: “…çdo herë kur printohet Vërtetimi i Gjendjes Gjyqësore me shënime, del dhe statusi i dënuar si në këtë rast. Shtetasi E. L. V. ka 3 vendime pafajësie.” Në çdo rast, as në kërkesën e Prokurorisë së Posaçme drejtuar Gjykatës së Posaçme të Shkallës së Parë për Korrupsionin dhe Krimin e Organizuar, por as nga kjo e fundit, nuk është përdorur si rrethanë gjendja gjyqësore e shtetasit nën hetim E.V, për të caktuar ndaj këtij të fundit masën shtrënguese të parashikuar nga neni 238 i Kodit të Procedurës Penale.
Lidhur me statusin pati një reagim edhe nga kryebashkiaku Erion Veliaj, i cili është transferuar në burgun e Durrësit. Sipas Veliajt, kur pyeti në gjyq për këtë pikë të dosjes, prokurori Ols Dado u detyrua ta verifikonte me një telefonatë dhe u përgjigj në sallën e gjyqit se ishte një "lapsus"./ZËRI
