TIRANË- Modelja e njohur nga Kosova, Ziza Pajaziti ka vizituar për një takim special të dënuarin me burgim të përjetshëm që po vuan dënimin në burgun e sigurisë së lartë në Drenovë të Korçës, Laert Haxhiu. Gazetari i Ora News, Elton Qyno shkruan se takimi ka ndodhur më 12 qershor 2025.
Pajaziti, sipas një raporti sekret, është paraqitur në ambientet e burgut të Drenovës, pasi zyrtarisht kishte planifikuar një takim me të dënuarin Vladimit Kurti, i cili është dënuar me burg të përjetshëm për vrasjen e tregtarit, Agim Buçi, ngjarje e ndodhur në Kamëz.
Vladimir Kurti, vuan dënimin në Godinën “A”, pikërisht në qelinë Nr.5. Ndërsa Laert Haxhiu, vuan dënimin në të njëjtën godinë, por në qelinë Nr.6, ngjitur me atë të Vladimir Kurtit.
Modelja është akomoduar në dhomën e takimeve special dhe në dhomë nuk i ka shkuar Kurti siç ishte planifikuar, por Laert Haxhiu.
Takimi mësohet të ketë zgjatur rreth 1 orë dhe më pas, Pajaziti ka dalë nga ambientet e burgut. Ndërsa Haxhiu është shoqëruar nga policia sërish në ambientet e dhomës Nr. 6 që ndodhet në katin e parë të godinës.
Kjo ngjarje solli dhe sekuestrimin e celularit të Laert Haxhiut dhe më pas pezullimin e drejtorit të burgut, Fatjon Fasho dhe shefit të policisë së Burgut, Sokol Kaçoli. Të dy po hetohen për “shpërdorim detyre”./ZËRI/
