TIRANË- Prej disa minutash qytetarët e Tiranës kanë qenë në ankth, pasi një çantë e dyshimtë e gjetur pranë qendrës 'Galeria', mes bulevardit Zogu i Parë dhe Rrugës së Barrikadave ngjalli dyshime për eksploziv. Megjithatë, ka rezultuar alarm i rremë.
Policia ka rrethuar zonën dhe ka kryer verifikimet e nevojshme, ndërsa pas hapjes së valixhes, është konstatuar se brenda saj ndodheshin vegla ndërtimi. Sipas policisë, nga këqyrja e pamjeve filmike ka rezultuar se valixhja ishte harruar nga disa punonjës ndërtimi.
Njoftimi i policisë:
Tiranë/Informacion paraprak
Më datë 02.03.2026, rreth orës 18:30, është njoftuar Salla operative se në rrugën “Bardhok Biba”, në trotuar, ndodhej një valixhe e dyshimtë.
Shërbimet e Policisë bënë rrethimin e vendit dhe njoftuan forcat xheniere. Pas verifikimeve dhe hapjes së valixhes, është konstatuar se brenda saj ndodheshin vegla ndërtimi.
Nga këqyrja e pamjeve filmike ka rezultuar se valixhja ishte harruar nga disa punonjës ndërtimi.
/ZËRI
