TIRANË- Kryetari i Partisë Agrare Ambientaliste, Agron Duka ka bërë me dije se nuk do të kandidojë më për deputet në zgjedhjet e ardhshme parlamentare. Lajmin e ka bërë me dije vetë ai, gjatë një deklarate për shtyp në Kryesinë e Kuvendit të Shqipërisë. Në fjalën e tij, Duka shprehu mirënjohjen për besimin që ka marrë nga qytetarët dhe mbështetësit gjatë karrierës së tij politike. Por shtoi se edhe pse ka vendosur që të mos kandidojë më për deputet, do të japë kontributin e tij maksimal në çdo qark.
“Unë e kam thënë, unë nuk kandidoj më për Parlament, t’i hapet rruga të rinjve. Do jap kontribut maksimal në çdo qark ku do kemi kandidatë për deputetë,”- deklaroi Duka.
Edhe pse jo në postin e deputetit, ai do të vazhdojë që të mbetet i angazhuar në jetën politike të vendit.
Duka është kreu i Partisë Agrare Ambientaliste, parti politike shqiptare e themeluar në vitin 1991. Partia u themelua nga Lufter Xhuveli. Fillimisht, partia njihej si Partia Agrare e Shqipërisë ( Partia Agrare e Shqipërisë ), derisa në vitin 2003 ndodhi një ndryshim i emrit. Është një parti reformiste që mbështet një sistem ekonomik të tregut të lirë. Në zgjedhjet vendore të vitit 2003 , të parat që u kontestuan me emrin e ri PAA, partia konkurroi në aleancë me Partinë Socialiste të Shqipërisë (PSSH) në disa zona. Kombinati PAA-PSSH fitoi në tre bashki.
Në zgjedhjet parlamentare të vitit 2005, partia mori 88,605 vota (6,5%) dhe 4 mandate. Në vitin 1998, Xhuveli u bë ministër i Bujqësisë. Në qeverinë Majko ai u emërua ministër i Mjedisit në shkurt 2002. Në vitin 2003, u zëvendësua gjatë reformave të kryeministrit Fatos Nano.
Në vitin 2016, Xhuveli dha dorëheqjen dhe postin e kryetarit të PAA-së, e mori Agron Duka./ZËRI
