TIRANË- Vjedhja e të dhënave nga sistemi TIMS pothuajse ka shkaktuar përplasje me armë zjarri. Gazetari Ferdinand Dervishi është shprehur në “Opinion” se bashkëpunëtorë kanë qenë dhe persona nga jashtë pasi vetë punonjësit e policisë kanë refuzuar që të bashkëpunonin dhe se gati sa nuk janë nxjerrë pistoletat mes atyre që donin të mbronin të dhënat e shqiptarëve dhe atyre që tentonin t’i merrnin ato. Gazetarja Klodiana Lala tha se sinjali i parë është dhënë nga shefi i sektorit në Drejtorinë e Teknologjisë dhe Informacionit (DTI), Ardit Muço, që u ka nisur email Drejtorit të Policisë së Shtetit, Muhamet Rrumballuku, e për dijeni Ambasadës së SHBA-së, SPAK e disa institucioneve të tjera.
Lala tha më tej se Muça është emëruar posaçërisht për këtë gjë si drejtor i Teknologjisë dhe Informacionit në Policinë e Shtetit dhe se ka përdorur kartën e një punonjëseje të tij. Por, ka hasur në kundërshtinë e shefit të sektorit që i ka ndërprerë aksesin në server duke e nxjerrë jashtë sistemit. Bashkëpunëtor ka pasur Klodian Mazarin që është me detyrë përgjegjës sektori në AKSH.
