TIRANË- Partitë Politike kanë kohë deri mesnatën e sotme për të vendosur për emrat që do të fusin në listën e kandidatëve për deputetë. Partia e parë që ka dorëzuar listën është "Lëvizja Bashkë". Lista në Tiranë udhëhiqet nga Redi Muçi, ndërsa i dyti është Arlind Qori, kryetari i “Lëvizjes Bashkë”. Kryeministri Edi Rama po zhvillon takime të njëpasnjëshme me drejtuesit politikë në seli, ndërkohë që është raportuar se tre kryebashkiakë kanë dhënë dorëheqjen nga postet e tyre për të garuar për deputetë.
Bëhet fjalë për kryebashkiakun e Matit Agron Malaj, kryebashkiakun e Tepelenës Tërmet Peçi dhe kryebashkiakun e Beratit Ervin Demo. Pritet gjithashtu edhe zyrtarizimi i emrit të kryebashkiakes së Roskovecit, Majlinda Bufi.
Ndërsa në Partinë Demokratike ka pasur rrjedhje. Deputeti Dashnor Sula ka deklaruar se kryedemokrati Sali Berisha e ka lënë jashtë listës për shkak të mbështetjes që i ka dhënë Prokurorisë së Posaçme dhe drejtësisë së re. Një gjë e tillë është kundërshtuar nga vetë Berisha, i cili është shprehur se ende nuk është marrë vendimi përfundimtar për emrat.
Mesditën e sotme pati edhe një largim të 'Partisë Aleanca e Maqedonasve' nga koalicioni i Partisë Demokratike. Këtë gjë Berisha e konsideroi tradhëti, ndërkohë që është raportuar se Vasil Sterjovski po negocion me Partinë Socialiste.
