TURQI - Futbolli turk është goditur nga skena të tjera dhune në fushë, pasi pesë lojtarë u përjashtuan nga fusha e lojës, pas një përleshjeje masive. Bursaspor po luante kundër Diyarbekirspor në kategorinë e dytë të vendit, me mysafirët që fituan 2-0 falë një goli të realizuar në çdo pjesë të lojës. Është e paqartë se çfarë e shkaktoi përleshjen në minutat e fundit, por duket se në sherr janë përfshirë pothuajse të gjithë lojtarët në fushë dhe të dy ekipet stërvitore. Policia u përpoq që të ndalojë sherrin masiv, por nuk kishte sukses.
Mes futbollistëve kishte një sherr të paprecedent, duke u përdorur edhe shishe. Pasi u rivendos qetësia përfundimisht pas disa minutash konflikt të bujshëm, gjithsej pesë lojtarë u përjashtuan, dy nga Bursaspor dhe tre nga Diyarbekirspor. Përleshja ritheksoi gjendjen e kaosit, në të cilën ndodhet aktualisht futbolli turk.
Javën e kaluar, presidenti i MKE Ankaragucu, Faruk Koca, hyri në fushë dhe goditi me grusht gjyqtarin Halil Umut Meler, një nga zyrtarët më të lartë të futbollit në vend. Meler u shtrua në spital, ndërsa Koca dha dorëheqjen nga klubi i tij dhe u dënua me një ndalim të përjetshëm nga futbolli nga Federata Turke./ZËRI/
