PRISHTINË – Në Prishtinë të Kosovës u mbajt mbrëmja gala “Laurentët”, ku u dhanë çmime për trajnerin më të mirë, futbollistin e vitit, golashënuesin më të mirë të kampionatit vendas, si dhe u publikua edhe formacioni më i mirë për vitin 2023.
Në këtë event, organizuar nga Federata e Futbollit e Kosovës, “Trajner i vitit” është vlerësuar Ilir Daja. Ai e fitoi këtë çmim, për punën fantastike që ka bërë tek Ballkani i Suharekës, me të cilën fitoi titullin kampion, por edhe arriti të shkojë në fazën e grupeve të Conference League. Ballkani udhëheq kampionatin e Kosovës, kur ka mbaruar gjysma e rrugëtimit për këtë sezon.
Çmimin për Dajën e dha trajneri i njohur dhe legjenda e futbollit të Kosovës, Ajet Shosholli. Daja në fjalën e tij deklaroi se ndihet i nderuar për çmimin që iu dha. “Ndihem i nderuar për çmimin që arrita të fitoj”, tha Daja. Ai shtoi se ndihet një prej të gjithë personave që jep kontribut për futbollin në Kosovë.
Futbollisti i vitit në Kosovë u shpall Lumbardh Dellova, çmimi Fadil Vokrri iu dha Amir Rrahmanit, golashënuesi më i mirë u shpall Albion Rrahmani, Çmimi i Karrierës u dha për Samir Ujkanin, ndërsa u shpall dhe formacioni më i mirë për 2023./ZËRI/
