VJENË- Organizata Botërore e Shëndetësisë i ka kërkuar autoriteteve qeveritare të kufizojnë përdorimin e telefonave inteligjentë pasi ata janë të dëmshëm dhe kanë një ndikim negativ në shëndetin mendor të të rinjve. Sipas OBSH përdorimi i celularëve është po aq i dëmshëm sa duhanpirja.
“Me shifra në rritje se lojërat online dhe roli i mediave sociale është gjithmonë e më prezentë mes adoleshentëve në Evropë, shtetet duhet të frymëzohen nga fusha të tjera të shëndetit publik ku legjislacioni ka ndihmuar në trajtimin e zakoneve potencialisht të dëmshme siç janë ligjet për duhanin”, tha zëdhënësja e OBSH, Natasha Azzopardi-Muscat për Politico.
Sipas sugjerimit të OBSH autoritetet duhet të marrin masa për kufizimin e moshës dhe duhet të kufzojnë përdorimin e celularit në disa zona të përcaktuara në publik, njëjtë si me duhanin.
“Duhet të mendojmë se ku është e përshtatshme të përdorim pajisjet dixhitale dhe është koha të fillojmë të mendojmë për vendet ku disa pajisje dixhitale nuk duhet të përdoren ashtu siç e kemi ndaluar pirjen e duhanit në zona të caktuara. Një element tjetër kyç është të sigurohet që fëmijët dhe adoleshentët, pavarësisht prejardhjes, përkatësisë etnike apo statusit social, të jenë të arsimuar”, tha ajo.
Një studim i OBSH-së i publikuar muajin e kaluar zbuloi se varësia nga lojërat e ndryshme dhe mediat sociale është në rritje mes adoleshentëve në Evropë. /ZËRI
