JUVENTUS- Telashet te Juventus nuk kanë të sosur. Sipas “Gazzetta Dello Sport”, sulmuesi portugez Cristiano Ronaldo ka kryer hapat e parë zyrtarë për të hedhur në gjyq skuadrën e Juventus. Ai kërkon të marrë nga bardhezinjtë 19.9 milionë euro të rrogës së tij, të cilat ishin shtyrë për shkak të pandemisë.
Këto ishin manovra financiare që asokohe Juventus i përdori për shkak të pandemisë Covid-19, si pjesë e dy kësteve të rrogës që i takojnë portugezit. Ronaldo ka kohë që ka folur për këtë cështje, duke kërkuar edhe ndihmën e prokurorisë së Torinos, por pa sukses. CR7 luajti për tri sezone me bardhezinjtë.
Manovrat financiare të Juventus për rrogat e futbollistëve të saj u aplikuan kur u ndërpre kampionati, për 105 ditë (mars-qershor 2020). Ronaldo merrte nga bardhezinjtë 31 milionë euro në sezon, ndërkohë që 19.9 milionë euro të kësaj shume nuk janë depozituar ende.
Dy këstet e rrogës u vendosën më mënyrë kolegjiale nga të gjithë: E para përfshinte të gjithë skuadrën dhe e dyta në mënyrë individuale për cdo futbollist. Të njëjtin problem pati edhe Dybala, por që gjeti një zgjidhje me Juventus, duke marrë 3 milionë euro që i detyrohej klubi bardhezi.
