PARIS- Ndryshe nga se pritej, atletja shqiptare Luiza Gega nuk mundi ta prekë finalen e Lojërave Olimpike “Paris 2024”. Sportistja nuk ia doli të kualifikohet në finalen e 3000 metrave me pengesa, pasi u rendit në vendin e 9-të në baterinë ku garoi. Me kohën 9 minuta, 27 sekonda e 41 të qindat, Gega nuk arriti të jetë mes e atleteve që garojnë për medaljen Olimpike.
Pas garës ka ardhur edhe vetë reagimi i Gegës, e cila shprehet se ndihet e dështuar dhe rrëfen se në muajin prill, kur ka nisur procesin e stërvitjes, nuk ka qenë në gjendjen e saj optimale shëndetësore.
Reagimi i plotë i sportistes, Luiza Gega:
“Është kaq vështirë të gjesh fjalë kur ndihesh totalisht e dështuar dhe në fakt në këto momente e tillë ndihem. E di që do kaloj, cdo gjë kalon me kohën por në këtë moment dhemb shumë sepse vërtet jam munduar dhe ënderruar që do ja dal pavarsisht se gjërat që në muajin prill pasi u sëmura gjërat morën “dishezen”. Gjithsesi përsëri përpiqesha fort cdo ditë edhe perse me shumë stres nga ndjesitë jo të mira të trupit tim përsëri rrija me shpresën që do e perballoja një garë të niveli por në fakt nuk ndodhi kështu. Edhe përse nuk e kam thënë kam qenë në dilemë të madhe me veten nëse duhet të vija apo jo por e di që pengu për të mos e provuar do më lëndonte më shumë. Dua vertet ti kerkoj falje kujdo që besoi tek unë dhe e zhgënjeva dhe falenderoj të gjithe ato që më mbështesin si në dite te mira qoftë dhe të vështira. Ëndrra e Parisit mbyllet sot”, shkruan Gega./ ZËRI
