SHBA - Një neurologe ka zbuluar katër aktivitetet, që ajo nuk do t'i linte kurrë fëmijët e saj t’i bëjnë, sepse shkaktojnë dëme në tru. Sipas saj, fëmijët mund të dëmtohen rëndë në tru nga loja e futbollit amerikan, si dhe nga gjuajtja me armë zjarri. Dr. Puja Aggarual është një eksperte mjekësore, e cila shpesh ndan këshilla për 'përmirësimin e shëndetit të trurit' në llogarinë e saj në TikTok, ku ajo krenohet se ka më tepër se 7000 ndjekës.
Kohët e fundit, neurologia, e cila jeton në Florida ka treguar se cilat janë aktivitetet, të cilat nuk duhet të ushtruhen nga fëmijët, sepse mund të jenë të dëmshme për trurin e të vegjëlve. Në një video virale, e cila deri më tani ka grumbulluar më shumë se 3.4 milionë shikime, doktoresha tregoi pse nuk do t'i lejonte fëmijët e saj të luanin futboll amerikan, të hipnin në ‘mini makina’, të gjuanin me armë ose të hidheshin në trampolinë. "Ka katër gjëra që unë nuk do t'i lejoja kurrë fëmijët e mi t'i bënin si neurologe dhe neuroshkencëtare, sepse aktivitetet mund të vrasin shumë qeliza të trurit ose thjesht t'ju vrasin ju", tha ajo. Aktiviteti i parë në të cilin ajo do të refuzonte t'i linte fëmijët e saj të merrnin pjesë ishte futbolli amerikan.
“Numri një, futbolli amerikan. Ju mund të merrni shumë tronditje dhe lëndime në kokë dhe kjo mund të çojë në encefalopati kronike traumatike”, - shpjegoi ajo. Sipas Protect the Brain, në futboll, lëndimet e trurit përbëjnë 65 deri në 95 për qind të të gjitha vdekjeve.
Në çdo sezon të caktuar, 10 për qind e lojtarëve të kolegjit dhe 20 për qind e lojtarëve të shkollave të mesme pësojnë lëndime të trurit. Këto dëmtime të trurit mund të ndikojnë që lojtarët të zhvillojnë encefalopati, e cila është një gjendje që shkakton mosfunksionim të trurit, me pasoja si humbja e kujtesës, ndryshimet e personalitetit dhe gjendje e komës.
Shumë fëmijë përdorin makina të vogla elektrike. Neurologia thotë se edhe këta mjete janë të dëmshme për trurin e vogëlushëve. Sipas Top Gear Box, makinat elektrike të vogla rrotullohen shumë lehtë dhe kur kjo ndodh, në shumicën e rasteve, mund të rezultojë në lëndime fatale të trurit.
“E treta veprimtari e rrezikshme është hedhja nga trampolina. Përsëri, fëmijët mund të bien keq, të godasin kokën në tokë [dhe kjo mund të rezultojë në tronditje dhe lëndime në kokë,” shtoi neuroshkencëtarja.
Për shkak të rasteve të shumta të dëmtimeve të marra nga kërcimi në trampolinë, Akademia Amerikane e Pediatrisë rekomandon që të mos blini kurrë një trampolinë për përdorim në shtëpi. Së fundmi, doktoreshë Puja tha se nuk do t'i lejonte fëmijët e saj të qëllonin me armë. Ajo shpjegoi: “Aktiviteti numër katër që paraqet rrezikshmëri, gjuajtja me armë. Është shumë e rrezikshme”. Zhurma dhe ndjenja e zhurmës së një arme është e mjaftueshme që dikush të zhvillojë një dëmtim traumatik të trurit ose TBI, sipas Taktikave të Gjuetisë Speciale. TBI shkaktohet nga një forcë e jashtme që lëviz trurin përreth kafkës. Ndaj prindër, kini kujdes, përpiquni të mos lejoni fëmijët të zhvillojnë disa aktivitete, që janë të dëmshme për shëndetin dhe trurin e tyre./ZËRI/
