KENIA- Një atlete olimpike nga Uganda, me qendër në Kenia, Rebecca Cheptegei ndërroi jetë në spital nga plagët e shkaktuara nga zjarri. Ishte ish i dashuri i saj, ai që i vuri flakën për t'i marrë paratë e një gare që ajo kishte fituar. Babai i saj, Joseph Cheptegei, tha se vajza e tij e kishte denoncuar ish-partnerin e saj, Dickson Nidema, disa herë për dhunë, por Policia nuk kishte vepruar.
Incidenti ndodhi në praninë e dy vajzave të saj, 9 dhe 11 vjeç, kur Nidema e leu me benzinë dhe i vuri flakën.
Ngjarja ndjek një seri sulmesh ndaj atleteve femra në rajon, përfshirë vrasjen e Agnes Jebet Tirop në 2021 dhe Damaris Muthee Mutua në 2022, të dyja vrapuese keniane të vrara nga partnerët e tyre. Këto sulme shpesh lidhen me kontrollin e pasurive dhe të ardhurave që atletet fitojnë nga sponsorizimet dhe çmimet monetare, duke i bërë ato viktima të abuzimit dhe manipulimit.
Rebecca kishte lënë Ugandën për të shmangur dhunën dhe ishte vendosur në Kenia, ku investoi në tokë pranë terreneve stërvitore në Eldoret. Pas ndarjes nga Nidema, ai u përpoq të merrte kontrollin mbi pronën e saj, gjë që solli konflikte të shumta. Babai i saj theksoi se Rebecca nuk pati performancë të mirë në Lojërat Olimpike të Parisit për shkak të stresit të shkaktuar nga kërcënimet e tij.
Dhuna në familje me gjenezë të ardhurat monetare është një problem i përhapur në Kenia, ku OKB-ja raporton se gati një e katërta e grave përjetojnë dhunë nga partneri çdo vit, ndërsa sistemi gjyqësor përballet me ngecje në trajtimin e rasteve të tilla./ ZËRI
