ITALI- Kompania e anijeve Bayesian, njëkohësisht edhe e jahtit që u mbyt një javë më parë në Porticello, po punon planin për rikuperimin e jahtit luksoz që ndodhet nën 45 metra thellësi në ujërat e Porticello. Në rezervuarin e anijes kishte afërsisht 18 mijë litra karburant dhe prioritet do të jetë asgjësimi i lëndës që mund të ketë efekte ndotëse nëse do të rrjedhë nga anija raporton Tgcom.
Me indikacione të prokurorëve, zhytësit e rojes bregdetare janë rikthyer në aksion edhe në zonën ku u përmbyt jahti, gjysmë milje larg bregut, për të kryer disa kontrolle të kërkuara nga Prokuroria dhe për të monitoruar çdo derdhje të naftës.
Hapi i dytë do të jetë sigurimi i jahtit për të vazhduar me një plan të detajuar për rikuperimin e tij. Pasi rezervuari të jetë zbrazur dhe të hartohet një plan, kompania e transportit do ta paraqesë atë tek autoritetet për të marrë leje për të vazhduar me nxjerrjen e Bayesian, një operacion që mund të zgjasë disa javë.
Jahti "Bayesian" me flamur britanik, 56 metra e gjatë, u ankorua pak jashtë portit Porticello kur u godit nga një stuhi e fortë dhe u fundos brenda pak minutash. Siç raporton sot Daily Mail, autoritetet italiane kanë nisur një hetim për të përcaktuar nëse kishte vrima që ekuipazhi i kishte lënë të hapura, si pasojë e fundosjes së jahtit. Hetuesit do të shqyrtojnë nëse janë marrë masat e duhura, duke pasur parasysh parashikimin për mot të keq gjatë natës fatale dhe nëse ndonjë nga anëtarët e ekuipazhit është penalisht përgjegjës. / ZËRI
