BUENOS AIRES- Detaje të reja kanë dalë nga vdekja tragjike e këngëtarit Liam Payne. Sipas analizave toksikologjike Liam Payne kishte substanca të shumta në sistemin e tij kur u rrëzua për vdekje nga ballkoni i katit të tretë të dhomës së tij të hotelit në Buenos Aires, në Argjentinë.
Sipas BBC, në përgjigjet e analizave të toksikologjisë, këto substanca përfshinin “kokainën rozë”, një drogë rekreative që zakonisht është një përzierje e disa drogave duke përfshirë metamfetaminën, ketaminë, MDMA dhe disa të tjera, si dhe kokainën, benzodiazepinën.
Sipas burimeve, në dhomën e tij të hotelit u gjet edhe një tub alumini i improvizuar për të thithur drogën. Trupi i Payne do të qëndrojë në Argjentinë deri në përfundimin e autopsisë, ndërsa babai i tij tashmë ndodhet në Buenos Aires në pritje të miratimit të spitalit për të marrë trupin e tij.
Para vdekjes së Payne, zyrtarët e hotelit thirrën autoritetet dhe u kërkuan atyre të dërgonin dikë me urgjencë për shkak të një mysafiri që ata thanë se ishte i dehur nga droga dhe alkooli.
“Duhet të dërgojmë dikë me urgjencë sepse nuk e di nëse jeta e klientit është në rrezik sepse është në një dhomë me ballkon dhe kemi frikë se mund të bëjë diçka që kërcënon jetën e tij”, tha stafi i hotelit për shërbimet e urgjencës.
Kur autoritetet mbërritën afërsisht shtatë minuta më vonë, trupi i Payne u gjet në oborrin e brendshëm të hotelit, ku ai u shpall i vdekur në vendngjarje, tha Alberto Crescenti, drejtori i Shërbimit Mjekësor Emergjent të Buenos Aires.
Një raport paraprak i autopsisë nga Zyra e Prokurorit Publik Argjentinas zbuloi se Payne vdiq nga traumat e shumta dhe gjakderdhja e brendshme dhe e jashtme. 25 lëndime u raportuan në trupin e Payne. Raporti thoshte se dëmtimet në kokën e artistit ishin të mjaftueshme për të shkaktuar vdekjen. Ministria e Sigurisë e Buenos Aires tha se substanca të shumta dhe objekte të thyera u gjetën në dhomën e hotelit të Payne. /ZËRI
