TIRANË- Gazeta New York Times së fundmi përpiloi një listë me 100 filmat më të mirë të shekullit të 21-të, bazuar në votat e më shumë se 500 regjisorëve, aktorëve dhe kineastëve të tjerë me ndikim në Hollywood. Më poshtë, kemi zgjedhur 10 filma nga kryesimi i listës që shënuan kinematografinë bashkëkohore.
10. The Social Network, 2010.
Filmi i David Fincher përshkruan krijimin e Facebook-ut përmes historisë së Mark Zuckerberg, një student ambicioz, i cili krijoi një rrjet global që lidh njerëzit, por humbi miqtë e tij gjatë këtij procesi. “Rrjeti Social” nuk është vetëm një histori suksesi teknologjik, por edhe tradhtie, lakmie dhe alienimi njerëzor në epokën dixhitale. Jesse Eisenberg në rolin kryesor ofron një interpretim të paharrueshëm të themeluesit brilant, por emocionalisht të distancuar të Facebook-ut.
9. Spirited Away, 2001.
Kryevepra e Hayao Miyazaki na çon në një botë fantastike shpirtrash, perëndish dhe magjie përmes syve të vajzës së guximshme Chihiro. Kjo perlë e animuar fitoi zemrat e shikuesve në të gjithë botën me origjinalitetin, bukurinë vizuale dhe historinë e thellë emocionale të rritjes dhe guximit, që me të drejtë është në listën e filmave më të mirë të këtij shekulli.
8. Get out, 2017.
Debutimi regjisorial i Jordan Peele kombinon në mënyrë brilante tmerrin dhe kritikën sociale. Një afrikano-amerikan i ri Chris viziton familjen e të dashurës së tij dhe shpejt zbulon një komplot të lig. “Get Out” u bë një pikë referimi në horrorin modern.
7. Eternal Sunshine of the Spotless Mind, 2004.
Së bashku, Michel Gondry dhe Charlie Kaufman kanë krijuar një histori të paharrueshme dashurie dhe humbjeje. Jim Carrey dhe Kate Winslet luajnë rolin e një çifti që vendos të fshijë kujtimet e tyre për njëri-tjetrin, por kupton se dhimbja dhe gëzimi ua kanë formësuar jetën përgjithmonë. Filmi është vizualisht inovativ dhe prekës emocionalisht, duke lënë një përshtypje të fortë mbi rëndësinë e kujtesës.
6. No Country for old men, 2007.
Në këtë thriller plot tension nga vëllezërit Coen, Javier Bardem portretizon një vrasës gjakftohtë që terrorizon njerëzit e Teksasit. Filmi shfaq tension dhe brutalitet, duke eksploruar fatin, dhunën dhe kufijtë moralë. “No Country for Old Men” mbetet një nga arritjet më të fuqishme të kinemasë bashkëkohore amerikane.
5. Moonlight, 2016.
Historia e një afrikano-amerikani të ri që rritet në Miami, e përshkruar përmes tre fazave të jetës, është thellësisht intime dhe universale. Barry Jenkins realizoi një film plot butësi, trishtim dhe kërkim të identitetit, gjë që e bën atë një nga filmat më emocionalë dhe më të rëndësishëm të dekadës së fundit.
4. In the mood for love, 2000.
Wong Kar-Wai krijoi një kryevepër vizuale dhe emocionale për dy njerëz që zbulojnë tradhtinë e bashkëshortëve të tyre, por nuk përfshihen në një aferë jashtëmartesore. Në vend të pasionit, filmi ofron shikime të qeta, gjeste dhe dëshira të pathënë, duke e lënë audiencën të magjepsur nga eleganca dhe melankolia.
3. There will be blood, 2007.
Një rrëfim epik lakmie dhe ambicieje shkatërruese. Daniel Day-Lewis shkëlqen si Daniel Plainview, një naftëtar i pamëshirshëm që shkel gjithçka që i del përpara. Filmi i Paul Thomas Anderson përshkruan në mënyrë mbresëlënëse rënien e një njeriu të fiksuar pas pushtetit, gjë që është njëkohësisht interesante dhe tmerruese.
2. Mulholland Drive, 2001.
David Lynch i çon shikuesit në një labirint ëndrrash dhe iluzione përmes historisë së një aktoreje të re që mbërrin në Los Angeles. Ky është një nga eksplorimet më mistike dhe emocionale të anës së errët të Hollivudit dhe të psikikës njerëzore. Naomi Watts ofron një nga performancat më të mira të karrierës së saj.
1. Parasite, 2019.
Një film i Koresë së Jugut që pushtoi botën dhe bëri histori si filmi i parë që fitoi çmimin Oscar për Filmin më të Mirë, edhe pse nuk ishte realizuar në anglisht. "Paraziti" është një satirë brilante mbi dallimet klasore, plot me kthesa të papritura, humor të zi dhe tragjedi. Bong Joon Ho kombinon kritikën sociale me një histori plot tension, duke krijuar një nga veprat më të rëndësishme të kinemasë së kohës sonë./ZËRI
