SHBA- Rebecca Laws është rikthyer me deklarata të reja, ku ka folur për lidhjen e saj të dyshuar me David Beckham. Ajo pretendon se ka pasur një lidhje me futbollistin e famshëm më shumë se 20 vjet më parë. Në një intervistë për emisionin “60 Minutes Australia”, ish-asistentja personale e David Beckham pohon se ajo ka insistuar në të vërtetën gjatë gjithë këtyre viteve, pavarësisht mohimeve të tij.
Laws, e cila ka punuar si asistente e futbollistit në vitin 2003, kishte pohuar në një intervistë me News of the World në prill 2004 se ajo kishte një lidhje jashtëmartesore me të për 4 muaj, gjatë kohës që ai ishte i martuar me Victoria Beckham. Megjithatë, ai vetë i kishte hedhur poshtë akuzat, duke i quajtur “qesharake” në një deklaratë për “Guardian” dy dekada më parë.
Ajo pretendon se lidhja e tyre filloi në vitin 2003, kur Victoria Beckham nuk ndodhej në Spanjë. Siç ka deklaruar, futbollisti e ka ftuar në një hotel dhe ajo kaloi natën me të. Por dy javë më vonë, në një festë për ditëlindjen e Cristiano Ronaldos, ajo dyshohet se e pa atë të largohej me një modele tjetër, gjë që, siç thotë ajo, e tronditi. Pavarësisht mohimeve, ajo ende i qëndron fjalëve të saj.
“Këmbëngul në të vërtetën. Ishte shumë e guximshme nga ana ime që u përballa me ta”, tha ajo duke iu referuar ish-futbollistit dhe gruas së tij, Victoria Beckham. Siç theksoi ajo, në krah kishte vetëm të vërtetën, ndërsa çifti i famshëm kishte “avokatët më të mirë dhe PR-në më të fuqishëm”.
“Kurrë nuk e ekzagjerova, nuk kam gënjyer për asgjë. Kam përballë çiftin më të fuqishëm, që ka mediat në anën e tyre, paranë dhe avokatët më të mirë. Dhe e vetmja gjë që kisha në krah ishte e vërteta”.
Sot, në moshën 47-vjeçare, ajo po përpiqet të lërë pas skandalin. Rebecca Los tani jeton larg vëmendjes dhe është e martuar. Ajo ka dy fëmijë me Christjar Skaiaa dhe punon si mësuese joga dhe asistente mjekësore.
Në një intervistë që dha për DailyMail në vitin 2023, Rebecca Laws deklaroi se gjithçka që kaloi me David Beckham i dha asaj një mësim.
"Më vinte shumë keq për atë që kisha bërë dhe për mënyrën se si e trajtova atë, por gabimet më të mëdha të jetës janë mësimet më të mira që mësohen", vuri në dukje ajo.
“Gjërat ndodhin për një arsye. Dhe tani kam një jetë të mrekullueshme me burrin dhe fëmijët e mi të jashtëzakonshëm."
Më tej ajo tha se e vetmja arsye për të cilën po flet kundër akuzave të Beckham është sepse mendon se duhet të mbrohet. "Unë kam një familje dhe kam fëmijë dhe ata mund të kërkojnë në Google dhe mund të shikojnë dokumentarë", tha ajo më parë për Daily Mail./ZËRI
