LONDËR- Kompania e Ankandeve Sotheby's do të nxjerrë në ankand gjashtë fanella të veshura nga Lionel Messi gjatë fitores së Argjentinës në Kupën e Botës në futboll, gjatë vitit të kaluar dhe mendon se ato mund të bëhen koleksioni më i vlefshëm i relikeve sportive të shitura ndonjëherë, pasi mund të vlejnë më tepër se 10 milionë dollarë.
Kompania e ankandeve tha të hënën se do të nxjerrë në shitje në Nju Jork gjashtë nga shtatë fanellat, që kapiteni i Argjentinës kishte veshur në Katar, duke përfshirë atë që veshi në fitoren dramatike në finale kundër Francës. Si shumë futbollistë, ai shpesh e ndërron fanellën e tij me dikë nga skuadra kundërshtare, në fund të çdo ndeshjeje. Duke mposhtur Francën në penallti pas barazimit 3-3 në stadiumin Lusail, Argjentina fitoi Kupën e Botës së saj të tretë. Messi shënoi dy nga golat e Argjentinës.
Sotheby's, që u themelua në Londër në 1744, do të ofrojë bluzat e Messit midis 30 nëntorit dhe 14 dhjetorit. Një ekspozitë falas në selinë qendrore të kompanisë në Nju Jork do t'i lejojë publikut t'i shohë bluzat gjatë kohës që janë në ankand. Kompania e ankandeve po punon me startup-in e teknologjisë me bazë në SHBA, AC Momento, i cili bashkëpunon me sportistë të profilit të lartë, për të ndihmuar në menaxhimin e relikeve.
Rekordi aktual për një artikull sportiv të veshura në një lojë është fanella e finales së NBA-së e vitit 1998 e Michael Jordan, e cila u shit për 10.1 milionë dollarë në Sotheby's, në Nju Jork në shtator 2022. Rekordi aktual për një veshje futbolli të veshur gjatë lojës është një bluzë e veshur nga Diego Maradona në fitoren e Argjentinës në çerekfinalen e vitit 1986 ndaj Anglisë, ku ai shënoi një gol me dorën e tij. Bluza u shit për 9.3 milionë dollarë në Sotheby's në Londër, në maj 2022.
Fitorja e Kupës së Botës vitin e kaluar nënkuptonte se Messi përsëriti historinë e Maradonës në vitin 1986. Një pjesë e të ardhurave nga ankandi do t'i dhurohet Projektit UNICAS, të udhëhequr nga Spitali i Fëmijëve Sant Joan de Déu Barcelona me mbështetjen e Fondacionit Leo Messi, për të përmbushur nevojat e fëmijëve që vuajnë nga sëmundje të rralla. 36-vjeçari Messi, i cili aktualisht luan për Inter Miami në MLS, kaloi 17 vjet te Barcelona, duke fituar kampionatin e Spanjës në shumë herë dhe Ligën e Kampionëve të Europës 4 herë. Ai ka fituar Topin e Artë, i cili i jepet çdo vit lojtarit më të mirë të futbollit, plot tetë herë. Por ishte triumfi i tij në Katar që ‘çimentoi’ vendin e tij mes të mëdhenjve të të gjitha kohërave, si Pele dhe Maradona. Kjo është arsyeja pse bluzat e tij janë potencialisht kaq të vlefshme./Zëri.ai/
