SHBA-Aktorja Michelle Trachtenberg, e njohur për interpretimet e saj në filmat “Buffy the “Vampire Slayer” dhe “Harriet the Spy” u nda nga jeta në moshën 39-vjeçare. Aktorja u gjet pa shenja jete në një apartament në New York nga mamaja e saj.
Policia iu përgjigj një thirrjeje urgjente në rezidencën e saj në orën 8:01 të mëngjesit më 26 shkurt 2025. Pas mbërritjes, ata gjetën Trachtenberg pa ndjenja. Shërbimet e urgjencës mjekësore kanë konstatuar vdekjen e saj në vendngjarje. Një deklaratë nga forcat e rendit konfirmoi se nuk dyshohet për veprimtari kriminale dhe mjeku do të kryejë autopsi për të sqaruar rrethanat e vdekjes së saj.
Nuk dihet ende shkaku i vdekjes, por mësohet se Trachtenberg i ishte nënshtruar një transplanti të mëlçisë muaj para se të vdiste dhe mund të kishte përjetuar komplikime në lidhje me procedurën. Burime për ABC News thonë se ajo “mund të ketë pas komplikime”.
Teksa priten rezultatet e autopsisë burimet sugjerojnë se aktorja kishte luftuar me probleme të lidhura me alkoolin, të cilat mund të çojnë në dëmtime të rënda të mëlçisë dhe nevojën për një transplant. Vdekja e saj e papritur erdhi pas postimeve shqetësuese që ajo kishte postuar muajt e fundit në rrjetet sociale. Fansat kishin shprehur shqetësim për mirëqenien e Trachtenberg në javët para vdekjes së saj./ZËRI
