TIRANË- Kryeministri Edi Rama në një takim në Dibër në kuadër të procesit për rienergjizimin e PS, është shprehur se lidershipi i forcës së tij politike është i pazëvendësueshëm. Ndërsa vlerësoi organizimin e partisë në këtë zonë, Rama tha se PS është një forcë progresive dhe se opozita krijonte një gjendje të pa ndryshuar kudo që qeveriste. Rama u ndal edhe tek protestat e opozitës në Parlament.
Rama: Vitet që kemi përpara janë të vështirë për të realizuar shumë detyra në të gjitha gradat e shikimit, 360 gradë duhet të përmirësojmë dhe realizojmë gjëra si Shqipëri. Kjo kërkon lidership dhe lidershipi i PS është e pazëvendësueshme. Çdo lloj forme tjetër qeverisjeje që përfshin të tjerë në kushtet e sotme, me çfarë ka sot fusha lojtarë të vjetër e të rinj që janë më të vjetër se të vjetrit kur i dëgjon, është një kërcënim për kthimin e vendit mbrapa. Në Dibër kemi tashmë një panoramë krejt tjetër. Qytetarët janë më të lidhur me qeverisjen vendore. PS është një forcë që sjell progres. Sa i përket rrugës për integrimin në BE, detyrat janë për të gjithë sektorët dhe pushtetet. Ne duhet vetëm të ulim kokën dhe të punojmë sa më fort. Por duhet një parti socialiste në formën optimale ku të gjithë ndidhen mirë. Sot njerëzit kanë kuptuar që nuk është punë tifozlliku, por punë interesi për progresin. Prandaj ka patur lëvizje jo vetëm këtu, por në të gjitha vendet, ku kulmi ka qenë Shkodra.
Ne jemi një forcë që sjell progres, ndërkohë që forcat e tjera sjellin rrëmujë, një status-quo që degradojnë realitetin ku ata qeverisin. Unë isha në Shkodër dhe realisht më ka lënë një mbresë shumë të keqe stadiumi i Shkodrës. Kjo ndodh kudo dhe kurdo kur ata marrin mandatin. Një stadium i ri për të luajtur ndeshjet ndërkombëtare që ishte katandisur në një objekt sikur aty kishte rënë bomba dhe prej vitesh nuk kishte shkelur njeri. Asnjë përkujdesje. Si stadiumi është e gjithë Shkodra, e cila hap pas hapi ka nisur të marrë veten. Si stadiumi ka qenë çdo bashki e Dibrës dhe këtë mund ta dëshmojnë lehtësisht të gjithë qytetarët që i kanë parë të gjitha fazat. Nëse sot kemi një panoramë që materializohet në kantiere të mëdha, përtej kantiereve, kjo vjen si rezultat i përmirësimit të realitetit të PS në Dibër. Besoj që edhe shifrat e anëtarësimeve të reja, të cilat janë mbresëlënëse janë tregues të këtij fakti.
Kanë shkuar në Parlament me votën e njerëzve dhe e marrin peng Parlamentin vetëm për interesat e tyre. Nuk dëmtohen ata. Në fund kanë shumë më tepër se sa çkanë shumica dërrmuese e atyre që kanë votuar. E sjell këtë shembull për të thënë se fillimi i një ndryshimit të kahjes së një mendimi se cilën parti duhet të mbështes dhe që sot është një potencial që duhet ta shfrytëzojmë. Nuk ka fare për ne rëndësi nëse dikush ka qenë përballë nesh, dhe kur është i gatshëm të bashkohet duhet ta mirëpresim krah hapur.
