TIRANË- Së shpejti do të prezantohet "paketa e maleve". Lajmin e ka bërë me dije kreu i qeverisë, kryeministri Edi Rama në një takim me kryebashkiakët në Shqipëri. Në fjalën e tij, Rama tha se prezantimi i nismës do të bëhet brenda këtij muaji. Kjo nismë, sipas Ramës, synon që të mbështesin emigrantë që të hapin biznese, apo edhe ata që jetojnë në Tiranë por kanë një pasuri do përfshihet në paketë.
Gjatë takimit me kryebashkiakët, Rama solli edhe historinë e një djali me biznes në Theth, për të cilin tha se ndihmon me lekë edhe motrën dhe vëllain në Itali.
"Brenda këtij muaji prezantojmë paketën e maleve, një program i ri për të mbështetur ata që janë jashtë dhe duan ndihmë për të investuar në shtëpitë e tyre për t’i kthyer në sipërmarrje biznesi. Ata që janë në emigracion, apo ata që janë në Tiranë dhe kanë një pasuri atje. Është një paketë pozitive, kemi punuar gjatë që të mos jetë pak, por goxha domethënëse. Është një paketë që duhet ta përdorni ju, ta shfrytëzoni për të inkurajur më shumë dhe për t’iu dhënë më shumë shtysë atyre që e kanë me dy mendje. Në Theth kam takuar një djalë që me biznesin në Theth ndihmon me lekë motrën dhe vëllain që punojnë në Itali. Ata punojnë në Itali, por nuk iu del. Dhe u thoshte po hajdeni në Theth, se kemi mundësi të zgjerohemi, unë kam nevojë. Na vjen zor se do dukemi di dështakë. Është konkret personi, familja. Prandaj është e rëndësishme që paketën e maleve ta përdorin si instrument kryetarët e bashkive se kanë kontaktin më drejtpërdrejtë dhe kanë mundësi të kenë një komunikim që është më nxitës,"- tha Rama./ZËRI
