TIRANË-Këshilli i Ministrave ka miratuar një vendim që përcakton rregullat e organizimit, funksionimit dhe fushën e veprimit të policimit vullnetar në Shqipëri.
Mësohet se qëllimi i këtij vendimi është përmirësimi i sigurisë publike, forcimi i kapaciteteve të strukturave të Policisë së Shtetit dhe inkurajimi i angazhimit qytetar, duke promovuar bashkëpunimin ndërmjet policisë dhe komunitetit për rritjen e besimit dhe parandalimin e veprimtarive të kundërligjshme, në përputhje me legjislacionin në fuqi.
Në vendim shtohet se kohëzgjatja ditore e vullnetarizmit është periudha kohore e angazhimit të vullnetarit në shërbimin e policimit vullnetar, e cila nuk tejkalon 5 (pesë) orë në ditë dhe 25 (njëzet e pesë) orë në javë. Policët vullnetarë do të do të mbështesin forcat e rendit në sigurimin dhe garantimin e rendit publik në aktivitetet me karakter masiv, si tubime, koncerte, festivale, aktivitete sportive dhe organizime fetare.
Angazhimi i tyre do të kryhet nën mbikëqyrjen e një punonjësi të policisë, dhe përfshin fusha të ndryshme si:
Ruajtja e rendit në aktivitete masive publike;
Menaxhimi i trafikut në shkolla apo zona të frekuentuara;
Patrullime dhe monitorime për parandalimin e krimit;
Mbështetje në shkolla për sigurinë e nxënësve;
Informim dhe ndërgjegjësim mbi mbrojtjen e mjedisit;
Ndihmë në operacione kërkim-shpëtimi apo emergjenca civile.
