TIRANË- Pas Taulant Ballës që kërkoi largimin nga radhët e policisë së shtetit të çdo punonjësi të policisë që ka pasur akses në aplikacionet e koduara, ish-kryeministri Sali Berisha ka kërkuar që e njëjta praktikë të ndiqet dhe për politikanët, këtë herë përmes ligjit të dekriminalizimit. Përmes një deklarate nga foltorja e Kuvendit, Berisha është shprehur se ‘"Çdo politikan që përdor telefona të kriptuar, të jetë objekt i dekriminalizimit”.
“Propozimi im është ky: çdo politikan, çdo deputet dhe deputete, që ka përdorur EncroChat, që ka përdorur aplikacionin SKY ECC, që ka përdorur telefona të tjerë të kriptuar, ai të jetë objekt i dekriminalizimit.
Shoh se po largoni policë, shumë mirë. Por duhet të bëjmë në radhë të parë transparencën e politikanëve se ata janë udhëheqësit e krimit të organizuar”, u shpreh Berisha, teksa dënoi dhe kërcënimet që u janë bërë prokurorëve dhe njerëzve të drejtësisë nga banda e Laert Haxhiut, të cila u bënë publike pas pendimit të Artan Tafanit, i cili zbërtheu të paktën 6 vrasje të ndodhura në harkun kohor të 5 viteve.
“Së fundmi, dua të dënoj me forcën më të madhe kërcënimet ndaj punonjësve të drejtësisë. Dënoj me ashpërsinë më të madhe si një nga krimet më të rënda, çdo kërcënim ndaj çdo hetuesi, prokurori, gjykatësi, gazetari dhe cilido tjetër.
Por këtu dua të theksoj, dua të ndalem se këto kërcënime shfrytëzojnë rrjedhjen e informacioneve. Shfrytëzojnë pazarin që bëhet me informacionet. Kush e bën? Militantët tuaj e bëjnë, patronazhistët tuaj e bëjnë. Ata nxjerrin dosjet në treg te kriminelët dhe kriminelët më pas u vërsulen prokurorëve dhe gjykatësve.
Kujt i vijnë këto kërcënime? A e dini se të gjithë ata që janë marrë dhëmb për dhëmb me bandat, siç ishte kjo Selimi- unë nuk e njoh, siç është kjo në SPAK, ata dekonspirohen nga njerëzit tuaj, militantë që shesin informacione.
Si ka mundësi, t’ju bëj një pyetje- që nuk gjendet asnjë rrjedhës i informacioneve të dosjeve top-sekret. Dosjet e drejtësisë janë top-sekret në gjithë botën. Kjo është bërë rrugë dhe asnjë nuk gjendet. Kjo është një formë presioni të tmerrshëm ndaj tyre.
Po natyrisht, kur vihet Taulant Balla, njeriu i lidhur më shumë se kushdo tjetër me bandat në krye, nga të mos dalë çdo sekret? Nuk gjeni një rrjedhës se jeni vetë rrjedhës”, tha më tej Berisha.
-
-
Hetoni "KryeHetuesin"!
5 Tetor, 12:16 -
Zëri.ai ka ndjekur me një seri shkrimesh propozimin e Taulant Ballës për të përjashtuar nga radhët e policisë së shtetit të punonjësve që kanë pasur akses në aplikacionet e koduara. Paradoksi qëndron se në krye të këtyre hetimeve do të qëndrojë Ardi Veliu, një personazh me plot dritë hije, që edhe vetë është përmendur në komunikimet e dosjes Metamorfoza që ka pasur dijeni në lidhje me aktivitetet e paligjshme që kryheshin nga bandit. /Zëri.ai
