ATHINË- Takimi i Edi Ramës me shqiptarë në Athinë ka shkaktuar reagime të shumta, sidomos nga opozita greke, por duket se komentin më të ashpër e ka bërë Dora Bakojanis. Ish-ministrja e Jashtme foli për median greke "SKAI", duke komentuar takimin e kryeministrit Edi Rama me shqiptarët që jetojnë në Greqi. Megjithatë u shpreh se nuk i interesonte fare takimi por diçka tjetër që e lidhi me shtetin helen.
“Më intereson se çfarë bëri Rama me Fredi Belerin. Rruga europiane e Shqipërisë varet nga respekti që tregojnë ndaj pakicës greke dhe rrjedhimisht kalon nga Greqia. Rama të mos harrojë se Greqia ka ndikim politik tek votuesit shqiptarë që janë prezent në Greqi dhe këtë gjë nëse duam ta shfrytëzojmë mund ta bëjmë me shumë lehtësi,"-tha Bakojanis, duke iu referuar minoritetit grek në Shqipëri.
Të dielën, Rama mbajti një takim me shqiptarët në Greqi. Gjatë udhëtimit të tij në Athinë, Rama shoqërohej në Greqi nga pjesa më e madhe e kabinetit qeveritar, disa kryebashkiakë socialistë, si dhe gazetarë dhe personalitete të tjera të rëndësishme. Turi i Ramës me diasporën do të vijojë më pas dhe në Itali, Britaninë e Madhe dhe në Gjermani./ZËRI
