TIRANË - Policia e Tiranës njofton se ka identifikuar 3 persona, që dyshohet se kanë grabitur dhe mbajtur peng një 18-vjeçar. Dy prej tyre, Arnold Arapaj dhe Agim Drishti janë arrestuar, ndërsa bashkëpunëtori i tyre është shpallur në kërkim.
Mësohet se tre personat i kanë marrë forcërisht 18-vjeçarit varësen e floririt, celularin dhe më pas e kanë mbajtur peng në makinë.
Efektivët kanë arritur të identifikojnë tre autorët, dy 30-vjeçarë dhe një 33-vjeçar. Ngjarja ndodhi te Unaza e Re në kryeqytet.
Njoftimi i policisë:
'I vodhën me dhunë varësen e floririt dhe celularin një shtetasi, si dhe i hoqën lirinë duke e mbajtur me forcë në automjet, për disa orë, falë reagimit të menjëhershëm të shërbimeve Policisë, identifikohen 3 autorët e dyshuar.
2 prej tyre u kapën dhe u vunë në pranga, vijon puna për kapjen e bashkëpunëtorit.
Shërbimet e Komisariatit të Policisë Nr. 6, menjëherë pas marrjes së njoftimit se tre shtetas i kishin vjedhur me dhunë varësen e floririt dhe celularin, si dhe e kishin marrë forcërisht në automjetin e tyre, një 18-vjeçar, duke i hequr lirinë për disa orë, menjëherë kanë organizuar punën për identifikimin dhe kapjen e autorëve të kësaj ngjarjeje, me qëllim vënien e tyre përpara përgjegjësisë ligjore.
Si rezultat i reagimit të menjëhershëm të shërbimeve të Komisariatit të Policisë Nr. 6, u identifikuan dhe u vunë në pranga shtetasit: Arnold Arapaj, 30 vjeç, Agim Drishti, 30 vjeç, të dy banues në Tiranë. Gjithashtu u shpall në kërkim shtetasi R. A., 33 vjeç, banues në Tiranë.
Nga veprimet hetimore dyshohet se këta tre shtetas, në bashkëpunim me njëri-tjetrin, ditën e djeshme, në rrugën "Loni Ligori", në Unazë të Re, i kanë vjedhur me dhunë varësen e floririt dhe celularin, një 18-vjeçari, si dhe e kanë marrë atë me forcë në automjetin e tyre, duke i hequr lirinë për disa orë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme./Zëri.ai/
