TIRANË- Kryeministri Edi Rama ka mbledhur mëngjesin e sotëm drejtuesit politikë të qarqeve në një takim në selinë e Partisë Socialiste. Mbledhja e cila zgjati rreth 40 minuta, raportohet se në fokus kishte organizimin e brendshëm të kësaj partie.
Në qendër të diskutimeve ishte dhe një bilanc i ecurisë së turit të nisur nga PS, “Punët e Shqipërisë”. Turi që pritet të zgjasë deri në datën 12 qershor, ka qenë i fokusuar tek punët që janë bërë për Shqipërinë, duke përfshirë: rritja e pagave dhe pensioneve, procesi i anëtarësimit në BE, etj.
Takimi i Ramës në selinë rozë, vjen në kohë kur kjo forcë politike po përgatitet për zgjedhjet e brendshme që do të zhvillohen gjatë muajve të verës. Në këto zgjedhje pritet të zgjidhen drejtuesit e forumeve kryesore të kësaj force politike, si dhe krerët e degëve në të gjithë vendin.
