TIRANË-Komisioni Qendror i Zgjedhjeve (KQZ) ka hapur një zyrë të posaçme hetimi për të kontrolluar partitë dhe kandidatët gjatë fushatës zgjedhore, me fokus të veçantë tek ajo e zhvilluar online.
“Objekti i këtij vendimi përcakton: monitorimin e fushatës zgjedhore online; periudhën e monitorimit të fushatës; detyrat dhe përgjegjësitë e Strukturës së Posaçme; mënyrën e verifikimit”, thuhet në dokumentin e KQZ, siguruar nga “Report TV”.
Kjo strukturë do të përbëhet nga një numër prej katër specialistësh pjesë përbërëse e administratës së Komisionit Qendror të Zgjedhjeve. Një specialist do të angazhohet në kontrollin e Raporteve të Monitorimit të përditshëm të ngarkuara në Platformën Elektronike të Raportimit Financiar (PERF), të ngarkuara nga monitoruesit e terrenit.
Ndërkohë, 3 të tjerë do të ushtrojnë kontrolle të aktiviteteve të fushatës zgjedhore të kryera nga subjektet zgjedhore në rrjetet sociale dhe zhvillimin e veprimtarive të ndaluara të publikuara. Ata do të kontrollojnë postimet online për të parë nëse do të ketë shkelje të rregullave të Kodit Zgjedhor, përfshirë zhvillimin e aktiviteteve që KQZ-ja i ka ndaluar.
“Periudha e monitorimit të Strukturës së Posaçme fillon jo më parë se 30 ditë para datës së zgjedhjeve dhe përfundon jo me vonë se 60 ditë nga data e zgjedhjeve”, shkruhet në dokumentin e KQZ-së.
Ndër të tjera do të monitorohen edhe profilet e politikanëve në rrjetet sociale, nëse funksionarët deklarohen p.sh, si ministra, e nga ana tjetër postojnë mesazhe elektorale. Raportet e përditshme dhe informacionet në kohë reale, kjo strukturë e posaçme, do t’ia kalojë personave të kontaktit nga SPAK-u dhe Prokuroria e Përgjithshme, të cilët ditët e ardhshme do të vendosen në një zyrë të përbashkët në KQZ.
Masat e ndërmarra për zgjedhjet e 11 majit
Në prokuroritë e juridiksionit të përgjithshëm do të ngrihen seksione të posaçme të përkohshme për hetimin e veprave penale që prekin zgjedhjet e lira dhe sistemin demokratik të zgjedhjeve në kompetencën e tyre. Këto seksione do të ngrihen brenda 10 ditëve nga miratimi i këtij udhëzimi dhe do të funksionojnë deri në datën 31.5.2025.
Po ashtu sipas marrëveshjes së lidhur mes Prokurorit të Përgjithshëm dhe Drejtorit të Përgjithshëm të Policisë së Shtetit, Policia e Shtetit do të vendosë të dispozicion të seksioneve të posaçme të përkohshme oficerë të policisë gjyqësore, ekspertizë, pajisje logjistike si dhe grupe operacionale për mbështetjen e hetimeve.
SPAK ka njoftuar një sërë masash për zbatimin e Strategjisë së Hetimit dhe Parandalimit të Krimit Zgjedhor gjatë Zgjedhjeve për Kuvendin 2025. SPAK ka ngritur një task forcë, e cila do të përfshijë prokurorë, hetues të BKH-së, hetues financiarë, ekspertë dhe staf administrativ mbështetës. Sa i përket grupeve hetimor në terren, Prokuroria e Posaçme njoftoi se do të fokusohen në parandalimin dhe hetimin e veprave penale që lidhen me përdorimin e administratës publike, infrastrukturës shtetërore, dhe përfshirjen e grupeve kriminale në procesin zgjedhor./ZËRI
