TIRANË- Në një intervistë për “Shqipëria Live”, Kryeministri Edi Rama komentoi sot protestat që kanë shpërthyer kundër projektit në Zvërnec, si dhe situatën e pronave që lidhen me këtë investim.
Rama u ndal te zhvillimet e fundit të SPAK, përfshirë urdhër-arrestet e lëshuara në kuadër të hetimeve të ndryshme, mes tyre edhe për Artur Shehun, duke theksuar se ato nuk kanë lidhje me këtë çështje.
Sa i përket çështjes së pronave, Rama u shpreh se toka tashmë është shitur dhe nuk ka më pronarë të mëparshëm, ndërsa shtoi se çdo pretendim për pronësinë e tokës do të zgjidhet në gjykatë.
Rama gjithashtu garantoi se transaksionet ligjore janë të mbrojtura. Kreu i qeverisë sqaroi sërish se aktualisht nuk ka leje ndërtimi për projektin, por vetëm leje zhvillimi, që përfaqëson një aprovim paraprak të konceptit.
"Këto nuk kanë lidhje me njëra-tjetrën. Toka nuk është më e askujt, përveç atyre që e kanë blerë. Hetimet për persona që janë shitës të tokës janë hetimet që vazhdojnë dhe SPAK bën rrugën e vet. Sot që flasim, prona është e pronarëve që e kanë blerë nga këta shitës. Ajo pronë është jashtë çdo investigimi.
Kjo është një gjë shumë e mirë dhe një lajm shumë i mirë për ata që pretendojnë se prona është e tyre. Ata do ta provojnë në gjykatë nëse toka është e tyre dhe lekët do t’i marrin ata, jo ai që ka bërë shitjen.
Në pikëpamjen ligjore, investimi nuk rrezikon asgjë. Në pikëpamjen se si investitorët mund të ndihen nga një qasje mosmikëpritëse se si mund të pritet investimi, edhe pse është një qasje në bulevardin e Tiranës, jo në sheshin e Flamurit, sepse Vlora e do këtë investim, kjo është një çështje e investitorëve. Është një çmenduri që Shqipëria të refuzojë një investim 4 miliardë, duke qenë një vend që ka më pak se 27 miliardë ekonomi të vetën. Por shumica e shqiptarëve e do këtë investim.
Unë nuk jam autoriteti përkatës, por nuk ka asnjë shans në Shqipëri që të bëhen transaksione blerje-shitjesh pa certifikata. Sepse nuk besoj se ka kaq shumë budallenj sa të japin para pa pasur certifikata, pa i bërë skanimin nga ana e noterëve dhe avokatëve.
Ne jemi në një proces dhe nuk ka një leje ndërtimi dhe nuk ka pasur ndonjëherë një leje ndërtimi. Ka pasur leje zhvillimi, që është një aprovim paraprak i një koncepti”, tha Rama.
